سیہون: وزیراعلیٰ سندھ سید مراد علی شاہ نے عیدالفطر کے موقع پر سیہون میں میڈیا سے گفتگو کرتے ہوئے متنازعہ کینال منصوبوں پر اپنے دوٹوک موقف کا اعلان کیا۔ انہوں نے کہا کہ "بطور وزیراعلیٰ سندھ میں خود کہہ رہا ہوں کہ سندھ میں کینالز نہیں بنیں گی۔"
مراد علی شاہ نے وضاحت کی کہ نگران حکومت کے دور میں ایک اسکیم پیش کی گئی تھی جس کی اجازت ارسا سے طلب کی گئی تھی، لیکن ارسا نے جنوری میں غلط سرٹیفکیٹ جاری کیا۔ انہوں نے بتایا کہ سندھ حکومت نے اس سرٹیفکیٹ کو مشترکہ مفادات کونسل میں چیلنج کر دیا ہے، کیونکہ اگر کسی صوبے کو پانی کی تقسیم پر اعتراض ہو تو وہ اس فورم پر کیس دائر کر سکتا ہے۔
وزیراعلیٰ نے کہا کہ جیسے ہی متنازعہ منصوبوں کی معلومات سامنے آئیں، سندھ حکومت نے فوراً اعتراض کیا۔ انہوں نے اس بات پر زور دیا کہ جب تک مشترکہ مفادات کونسل کی میٹنگ نہیں ہوتی، یہ منصوبہ آگے نہیں بڑھ سکتا۔
