اسلام آباد: پاک بحریہ اور روسی بحریہ کے درمیان دوطرفہ مشق "عریبین مون سون" کا کامیاب انعقاد کیا گیا، جس کا مقصد دونوں افواج کے درمیان تعاون کو فروغ دینا اور خطے میں بحری سلامتی کو مستحکم کرنا تھا۔
پاکستان فوج کے شعبہ تعلقات عامہ (آئی ایس پی آر) کے مطابق، اس مشق میں پاک بحریہ کے مختلف اثاثے اور پاک فضائیہ کے لڑاکا طیارے بھی شریک تھے۔ مشق کا مقصد مشترکہ بحری خطرات کا مقابلہ کرنے کے لیے دونوں افواج کے درمیان ہم آہنگی کو بڑھانا تھا۔
آئی ایس پی آر کے مطابق، مشق کے دوران دونوں ممالک کے جہازوں کے دورے، ہاربر ڈرلز اور ٹیبل ٹاپ ڈسکشنز کا انعقاد کیا گیا۔ روسی بحریہ کے نمائندوں نے پاک بحریہ کے سینئر حکام سے ملاقات کی اور باہمی تعاون پر تبادلہ خیال کیا۔
آئی ایس پی آر کا کہنا تھا کہ اس مشق کے ذریعے، پاک بحریہ نے میری ٹائم ڈومین میں اپنی قیادت اور خطے میں بحری سلامتی کے لیے اپنے عزم کا اظہار کیا ہے۔
