ڈھاکا :پاکستان اور بنگلہ دیش کے درمیان خارجہ سیکریٹری سطح پر مشاورتی مذاکرات کا چھٹا دور 15 سال کے تعطل کے بعد ڈھاکا میں منعقد ہوا۔ پاکستانی وفد کی قیادت سیکریٹری خارجہ آمنہ بلوچ نے کی، جنہوں نے بنگلہ دیشی ہم منصب محمد جاشم الدین سے اسٹیٹ گیسٹ ہاؤس پدما میں ملاقات کی۔
اجلاس میں دونوں ممالک کے اعلیٰ سطحی وفود نے شرکت کی اور مشاورت خوشگوار ماحول میں انجام پائی۔ مذاکرات میں دو طرفہ تعلقات، باہمی تعاون، تجارتی روابط اور خطے کی موجودہ صورتحال پر تفصیلی تبادلہ خیال کیا گیا۔
فریقین نے تعاون کو فروغ دینے اور نئے امکانات تلاش کرنے پر بھی اتفاق کیا۔ بنگلہ دیشی میڈیا کے مطابق، پاکستان میں تعینات بنگلہ دیشی ہائی کمشنر اقبال حسین نے کہا کہ پاکستان کپاس، چینی، چاول اور گندم جیسی اشیاء کی برآمدات بڑھانے میں دلچسپی رکھتا ہے، بشرطیکہ قیمتیں موزوں ہوں۔
بعدازاں، آمنہ بلوچ نے بنگلہ دیش کے چیف ایڈوائزر محمد یونس سے بھی ملاقات کی۔ اس موقع پر سرمایہ کاری، نوجوانوں کے درمیان روابط، علاقائی انضمام اور سارک کے احیاء پر گفتگو ہوئی۔ ڈاکٹر یونس نے دو طرفہ تعلقات پر اپنا ویژن پیش کیا، جبکہ آمنہ بلوچ نے ان کا شکریہ ادا کرتے ہوئے پاکستانی قیادت کی نیک تمنائیں پہنچائیں۔
سیکریٹری خارجہ نے امور خارجہ کے مشیر توحید حسین سے بھی ملاقات کی، جس میں تجارتی و اقتصادی تعاون کے ساتھ ساتھ سارک کی بحالی پر بات چیت ہوئی۔ آمنہ بلوچ تھنک ٹینکس سے بھی ملاقات کریں گی۔
علاوہ ازیں، رواں ماہ کے آخر میں پاکستان کے نائب وزیراعظم اور وزیر خارجہ اسحٰق ڈار بھی سرکاری دورے پر ڈھاکا کا رخ کریں گے۔ اعلامیے کے مطابق خارجہ سیکریٹری سطح کے مشاورتی مذاکرات (FSC) کا آئندہ دور 2026 میں اسلام آباد میں منعقد ہوگا۔
