ممبئی: بھارت میں ایک شخص نے اپنی شادی کی پانچویں سالگرہ کے موقع پر دُلہن کی رخصتی کی ویڈیو شیئر کی، جس میں دُلہن کی ایک غیر متوقع حرکت نے سوشل میڈیا پر ہنگامہ مچادیا۔ ویڈیو پر مختلف قسم کے ردعمل سامنے آرہے ہیں۔
ویڈیو میں دیکھا جا سکتا ہے کہ شادی کی تمام رسومات روایتی طریقے سے جاری تھیں، لیکن جب پنڈت دُلہن کو ہدایت دیتے ہیں کہ وہ چاول کی ٹوکری سے کچھ چاول نکال کر اپنے والدین پر پھینکے، تو دُلہن نے پورا ٹوکری چاولوں کے ساتھ ان پر اچھال دی۔
اس حرکت پر دولہا حیرت سے پیچھے مڑ کر دیکھتا ہے اور پھر ہنس پڑتا ہے، جبکہ دُلہن کے والدین اور دیگر رشتہ دار بھی اس منظر سے محظوظ ہو جاتے ہیں۔
یہ ویڈیو نمیش دوشی نے شیئر کی اور کیپشن میں لکھا، "پانچ سال گزر گئے، لیکن رخصتی کا یہ حسین لمحہ آج بھی ویسا ہی تازہ ہے جیسے کل کی بات ہو۔" ویڈیو سوشل میڈیا پر وائرل ہونے کے بعد صارفین کی جانب سے دلچسپ تبصرے کیے جا رہے ہیں۔
ایک صارف نے کہا، "لگتا ہے دُلہن نے کبھی وداعی رسومات دیکھی ہی نہیں!" ایک اور صارف نے مذاق کرتے ہوئے لکھا، "یہ کچھ زیادہ ہی ہوگیا، شادی کی سالگرہ مبارک ہو!" اور ایک تیسرے نے کہا، "ایسی رخصتی پہلی بار دیکھی ہے، ہنسی روکنا مشکل ہوگیا!"
یہ ویڈیو تیزی سے وائرل ہو رہی ہے اور اب تک 46 لاکھ سے زائد لائکس حاصل کر چکی ہے۔ لوگوں نے دُلہن کی منفرد وداعی پر نہ صرف ہنسی کے ایموجیز پوسٹ کیے بلکہ جوڑے کو شادی کی سالگرہ کی مبارکباد بھی دی۔
