پیمرا کی جانب سے نیو نیوز پر عائد 10 لاکھ روپے جرمانے کا فیصلہ کالعدم قرار

لاہور: اسلام آباد ہائیکورٹ نے پیمرا کی جانب سے نیو نیوز کو عائد کردہ دس لاکھ روپے جرمانے کا فیصلہ کالعدم قرار دے دیا ۔

تفصیلات کے مطابق چیف جسٹس اسلام آباد ہائیکورٹ اطہر من اللہ نے نیو نیوز کی اپیل پر فیصلہ سنایا ۔ اپیل کنندہ کی جانب سے سعد رسول اور شان سعید گھمن ایڈوکیٹس نے دلائل دیئے ۔

چیف جسٹس نے ریمارکس دیتے ہوئے کہا کہ ریکارڈ سے معلوم ہوتا ہے کہ پروگرام میں زیر بحث کمیشن کی کارکردگی اور مینجمنٹ تھی ، انہوں نے مزید کہا کہ پروگرام میں محض گفتگو کی بنیاد پر اسے زیر التوا عدالتی معاملہ میں مداخلت کا مرتکب نہیں کہا جا سکتا ۔

نیو نیوز کا مؤقف ایک بار پھر سچ ثابت
اسلام آباد ہائیکورٹ سے بڑا فیصلہ آ گیا!#NeoNewsHD #NeoVideos #NeoBreakings pic.twitter.com/xIQT2lZCys

— Neo News (@NeoNewsUR) June 24, 2022

چیف جسٹس اسلام آباد ہائیکورٹ نے ریمارکس دیئے کہ کونسل آف کمپلینٹس نے صرف اس بنیاد پر جرمانہ عائد کیا کہ عدالت میں زیر التواء معاملے پر بحث کی گئی ، جبکہ عدالت مطمئن ہے کہ اس معاملے میں عدالتی زیر التواء معاملے کا اطلاق نہیں ہوتا ۔ انہوں نے کہا کہ کارروائی کے دوران بحث میں شریک ہونے والوں کا موقف نہیں لیا گیا اور نہ ہی انھیں کارروائی کا حصہ بنایا گیا ۔

عدالت نے نیو نیوز کی اپیل منظور کرتے ہوئے جرمانے کا فیصلہ کالعدم قرار دے دیا ۔