اسلام آباد : پاک چین اقتصادی راہداری کی مشترکہ رابطہ کمیٹی کااجلاس آج ہوگا۔حکام کے مطابق وزارت منصوبہ بندی اور چین کا این ڈی آر سی راہداری کے لیے سٹریٹجک روڈ میپ اجلاس میں پیش کریں گے ۔
اجلاس کی مشترکہ صدارت چیئرمین نیشنل ڈیولپمنٹ اینڈ ریفارم کمیشن اور وفاقی وزیر منصوبہ بندی احسن اقبال کریں گے۔مشترکہ رابطہ کمیٹی سی پیک میں فیصلہ سازی کا ایک اعلیٰ ادارہ ہے ۔ اجلاس میں سی پیک دوسرے مرحلے کے تحت پانچ نئے اقتصادی راہداریوں پر ورکنگ گروپس قائم کیے جائیں گے۔
حکام کا کہنا ہے کہ ان راہداریوں میں روزگار کی تخلیق کا راہداری، اختراع کی راہداری، گرین انرجی کی راہداری، اور جامع علاقائی ترقی شامل ہیں ۔ اہم منصوبوں کے اعلانات وزیر اعظم شہباز شریف کے دورہ بیجنگ کے دوران کیے جائیں گے ۔ اجلاس میں سی پیک 2025-30 دوسرے مرحلے میں سرمایہ کاری کے اہم امور طے کیے جائیں گے ۔
حکام کے مطابق اجلاس میں سی پیک کی سیکورٹی کیلئے ایک نیا مشترکہ ورکنگ گروپ قائم کرنے پر غور کیا جائے گا ۔ سیکورٹی ورکنگ گروپ دوسرے مرحلے میں سیکورٹی کی تمام تفصیلات طے کرے گا ۔پاکستان چینی کمپنیوں اور عملے کو فول پروف سیکورٹی کی گارنٹی دے گا ۔ سیکورٹی ورکنگ گروپ میں چینی کمپنیوں کی سیکورٹی چین کے معیارات کے مطابق بنائی جائے گی ۔
ذرائع کا کہنا ہے کہ سی پیک کے دوسرے مرحلے کا سب سے اہم منصوبہ پاکستان میں ریلوے نظام کو جدید بنانے کا ہے ۔ ریلوے کے ایم ایل ون منصوبے کیلئے بھی مشترکہ ورکنگ گروپ قائم کرنے کی تجویز ہے ۔ دوسرے مرحلے میں دونوں ممالک کے کاروباری گروپس مشترکہ منصوبے شروع کرنے پر غور کریں گے ۔ دوسرے مرحلے میں کوہالہ پن اور آزاد پتن بجلی گھر، گوادر پاور پلانٹ، کراچی سرکلر ریلوے اور تھاکوٹ رائے کوٹ سڑک کی تعمیر ہوں گے ۔
