سندھ اور بلوچستان میں گرمیوں کی چھٹیوں کے بعد سکول کھل گئے

کراچی : صوبہ سندھ اور بلوچستان میں گرمیوں کی تعطیلات کے بعد تعلیمی ادارے آج سے دوبارہ کھل گئے ہیں اور تدریسی عمل کا آغاز ہو چکا ہے۔ تاہم، سکولوں کے کھلنے کے پہلے روز طلبہ کی حاضری معمول سے بہت کم رہی۔

محکمہ تعلیم سندھ نے 1 جون سے 31 جولائی 2025 تک تعطیلات کا اعلان کیا تھا، جس کے بعد اب بچے سکول واپس آ گئے ہیں۔ دوسری جانب کراچی میں کئی نجی سکولز نے 4 اگست سے کھلنے کا اعلان کیا تھا۔

اگرچہ چھٹیاں ختم ہو چکی ہیں، لیکن طلبہ کی کم حاضری اس بات کو ظاہر کرتی ہے کہ بہت سے بچے ابھی تک واپس نہیں آئے یا موسم کی شدت کے باعث سکول نہیں پہنچ سکے۔