امریکی ٹیرف: بھارت کا ردعمل میں F-35 طیارے نہ خریدنے کا فیصلہ

نئی دہلی : امریکی صدر ڈونلڈ ٹرمپ کی جانب سے بھارت کی درآمدات پر 25 فیصد ٹیرف عائد کرنے کی دھمکی کے بعد بھارت نے امریکہ سے ففتھ جنریشن ایف 35 سٹیلتھ لڑاکا جیٹ خریدنے میں عدم دلچسپی کا اظہار کیا ہے۔ بلوم برگ کی رپورٹ کے مطابق، بھارت نے امریکی صدر کو مطلع کیا ہے کہ وہ امریکہ سے ایف 35 لڑاکا طیارے خریدنے کا ارادہ نہیں رکھتا۔

رپورٹ میں یہ بھی بتایا گیا ہے کہ بھارت نے امریکہ کے ساتھ تجارتی تعلقات کو بہتر بنانے کے لیے بعض دیگر اشیاء کی خریداری بڑھانے پر غور کیا ہے، لیکن اس میں دفاعی ساز و سامان، بشمول ایف 35 جیٹس کی خریداری شامل نہیں ہے۔ یہ فیصلہ امریکی صدر کی جانب سے بھارت پر عائد ٹیرف کی دھمکی کے بعد کیا گیا ہے۔

مودی کا وعدہ اور امریکی تجارتی صورتحال
اس سے قبل رواں سال کے آغاز میں بھارتی وزیرِاعظم نریندر مودی کے وائٹ ہاؤس دورے کے دوران صدر ٹرمپ نے بھارت کو ففتھ جنریشن ایف 35 لڑاکا طیارے فروخت کرنے کی پیشکش کی تھی، جس پر مودی نے غور کرنے کا وعدہ کیا تھا۔ تاہم، ٹرمپ کی حالیہ دھمکی کے بعد بھارت نے اس معاملے پر اپنی پوزیشن واضح کر دی ہے۔

بھارت اور امریکہ کے تجارتی تعلقات
رپورٹ کے مطابق، بھارت ٹرمپ کے عائد کردہ ٹیرف کے خلاف فوری طور پر کوئی جوابی اقدام کرنے کے قابل نہیں ہے اور وہ امریکہ کو ناراض کرنے سے بچنا چاہتا ہے۔ بھارت نے اس بات کا اعادہ کیا ہے کہ وہ امریکہ کے ساتھ دو طرفہ تجارتی بات چیت جاری رکھنے کا خواہشمند ہے، تاہم دفاعی ساز و سامان کی خریداری اس میں شامل نہیں۔

امریکی وزیر خزانہ کی تنقید
امریکی وزیر خزانہ نے بھارت پر تنقید کرتے ہوئے کہا ہے کہ بھارت روس سے تیل خریدتا ہے اور پھر اس تیل کو ریفائنڈ کر کے بیچتا ہے، اس طرح بھارت نے عالمی سطح پر خود کو ایک فعال کردار ادا کرنے والے ملک کے طور پر پیش نہیں کیا۔ انہوں نے کہا کہ امریکی صدر اور ان کی ٹیم بھارت کے رویے سے مایوس ہیں اور انہیں اس بات کا علم نہیں ہے کہ بھارت کے ساتھ تجارتی معاہدہ کیا ہوگا، کیونکہ یہ بھارت کے رویے پر منحصر ہے۔

اس سے قبل، ٹرمپ کی دھمکی کے بعد بھارت کی سرکاری آئل ریفائنریز نے روسی تیل کی خریداری روک دی تھی، جس سے دونوں ممالک کے تجارتی تعلقات پر مزید اثرات مرتب ہوئے ہیں۔