سوئٹزرلینڈ آتشزدگی میں ہلاکتوں کی تعداد 47 ہوگئی، وزیراعظم شہباز شریف کا اظہارِ افسوس

جنیوا : سوئٹزرلینڈ کے مشہور اسکی ریزورٹ کرانس مونٹانا میں نئے سال کی تقریب کے دوران ایک نائٹ کلب میں دھماکے اور آگ لگنے کے نتیجے میں تقریباً 47 افراد ہلاک اور 100 سے زائد زخمی ہو گئے ہیں۔ یہ واقعہ اُس وقت پیش آیا جب نائٹ کلب میں سالِ نو کی خوشیوں کا آغاز ہو رہا تھا اور ویڈیوز میں دکھایا گیا کہ عملہ جلتی ہوئی شیمپین بوتلیں اٹھا کر لے جا رہا تھا، جو لکڑی کی چھت سے بار بار ٹکرا رہی تھیں۔ تقریباً ڈیڑھ بجے رات اچانک آگ بھڑک اُٹھی اور چند ہی لمحوں میں پورا تہہ خانہ لپیٹ میں آگیا، جس سے بدحواسی پھیل گئی۔

حکام کے مطابق اس واقعے میں کم از کم 115 افراد زخمی ہوئے، جن میں سے کئی کی حالت تشویشناک ہے۔ تاحال اس آگ کے پیچھے کسی دہشت گردی یا مجرمانہ کارروائی کے شواہد نہیں ملے ہیں، اور یہ واقعہ بظاہر ایک حادثہ لگتا ہے۔

اطالوی حکام نے بتایا کہ 16 اطالوی شہری تاحال لاپتا ہیں، جبکہ 15 زخمی ہسپتال میں زیر علاج ہیں۔ فرانس کے وزارت خارجہ کے مطابق کم از کم 8 فرانسیسی شہریوں سے بھی رابطہ تاحال بحال نہیں ہو سکا ہے، اور فرانس کے فٹبال کلب ایف سی میتز نے تصدیق کی کہ اس کا 19 سالہ کھلاڑی تاہیریس ڈوس سانتوس اس واقعہ میں بری طرح جھلس گیا ہے، جسے جرمنی کے ایک ہسپتال منتقل کر دیا گیا ہے۔

دھماکے اور آتشزدگی کے نتیجے میں جاں بحق افراد کی شناخت میں وقت لگے گا، کیونکہ کئی لاشیں شدید حد تک جل گئی ہیں۔ حکام نے ڈی این اے اور دانتوں کے ریکارڈ کی مدد سے شناخت کا عمل شروع کر دیا ہے۔ سوئٹزرلینڈ کے برن سینٹرز میں گنجائش ختم ہونے کے باعث کئی شدید زخمیوں کو ہمسایہ ممالک کے ہسپتالوں میں منتقل کرنا پڑا۔

آتشزدگی کے بعد علاقے میں سوگ کا سماں ہے، اور سینکڑوں افراد متاثرہ نائٹ کلب کے قریب جمع ہو گئے، پھول رکھے اور اپنے لاپتا رشتہ داروں کے بارے میں خبریں ملنے کا انتظار کر رہے ہیں۔ سوئس صدر گائے پارمَلین نے اس واقعے کو ملک کی بدترین سانحات میں سے ایک قرار دیا اور کہا کہ زیادہ تر متاثرین نوجوان تھے جو نئے سال کا جشن منانے آئے تھے۔ برطانوی بادشاہ چارلس نے بھی اس واقعے پر افسوس کا اظہار کرتے ہوئے اسے دل دہلا دینے والا واقعہ قرار دیا۔

پاکستان کے وزیراعظم شہباز شریف نے بھی سوئٹزرلینڈ میں آتشزدگی کے واقعہ میں جانی نقصان پر افسوس کا اظہار کیا اور کہا کہ مشکل وقت میں سوئس حکومت اور عوام کے ساتھ کھڑے ہیں۔