وزیر اعلیٰ پنجاب مریم نواز شریف کا صحافیوں کے حقوق کے تحفظ کے عزم کا اظہار

لاہور: وزیر اعلیٰ پنجاب مریم نواز شریف نے صحافیوں کے حقوق کے تحفظ اور آزادی صحافت کے حوالے سے ایک اہم بیان دیا ہے، جس میں انہوں نے صحافیوں پر ظلم و تشدد کے خاتمے کا عزم ظاہر کیا۔ صحافیوں کے خلاف جرائم کے خاتمے کے عالمی دن کے موقع پر اپنے پیغام میں مریم نواز کا کہنا تھا کہ "صحافت کی آزادی جمہوریت کی اساس ہے" اور صحافی معاشرتی انصاف کے محافظ ہیں۔

مریم نواز نے مزید کہا کہ "صحافت کا آزاد ہونا مضبوط جمہوری معاشرے کے لیے نہایت ضروری ہے" اور حکومت صحافیوں کے حقوق کے تحفظ کے لیے مختلف اقدامات کر رہی ہے۔ انہوں نے اس بات پر بھی زور دیا کہ بے گھر صحافیوں کو اپنی چھت فراہم کرنے کے لیے حکومت پرعزم ہے اور حق و سچ کی راہ پر چلنے والے صحافیوں کی مکمل حمایت کی جائے گی۔

وزیر اعلیٰ پنجاب نے کہا کہ یہ دن منانے کا مقصد ان صحافیوں کو یاد کرنا ہے جو سچ کی پاداش میں قتل یا تشدد کا شکار ہوئے ہیں۔ انہوں نے یقین دہانی کرائی کہ پنجاب میں صحافت اور صحافی محفوظ ہیں اور یہاں صحافیوں کے قتل یا تشدد کے واقعات نہ تو ہوئے ہیں اور نہ ہوں گے۔

مریم نواز شریف نے اپنے پیغام میں اس عزم کا اظہار کیا کہ وہ بحیثیت وزیر اعلیٰ صحافت کی آزادی کے تحفظ کی ضامن ہوں گی اور صحافیوں کے حقوق کی ہر قیمت پر حفاظت کی جائے گی۔