توانائی بحران پر قابو پانے کی حکمتِ عملی: ملک بھر میں مارکیٹیں رات 8 بجے بند کرنے کا اصولی فیصلہ

اسلام آباد: وزیراعظم کی زیرِ صدارت منعقدہ اعلیٰ سطح کے اجلاس میں ملک میں جاری توانائی کے بحران سے نمٹنے کے لیے ہنگامی اقدامات کی منظوری دے دی گئی ہے، جس کے تحت ملک بھر کی تمام بڑی مارکیٹوں اور تجارتی مراکز کو رات 8 بجے بند کرنے کا اصولی فیصلہ کیا گیا ہے۔
وزیراعظم کی زیرِ صدارت ہونے والے اس اہم اجلاس میں وفاقی وزراء، متعلقہ وزارتوں کے سیکرٹریز اور توانائی کے ماہرین نے شرکت کی۔ ذرائع کے مطابق اجلاس میں ملک کی مجموعی معاشی صورتحال اور بجلی کی طلب و رسد کے فرق کا تفصیلی جائزہ لیا گیا۔اجلاس میں توانائی کی بچت کے قومی منصوبے پر غور کے بعد درج ذیل اہم نکات پر اتفاق کیا گیا۔ تجارتی سرگرمیوں کو جلد بند کر کے قومی گرڈ پر دباؤ کم کیا جائے گا تاکہ صنعتی اور گھریلو صارفین کو بجلی کی فراہمی بہتر بنائی جا سکے۔
 اس اقدام کا مقصد مہنگے درآمدی تیل اور گیس پر انحصار کم کرنا ہے، جس سے قیمتی زرمبادلہ کی بچت ہوگی۔ وزیراعظم نے ہدایت کی ہے کہ اس فیصلے کے نفاذ کے لیے تمام صوبوں کو اعتماد میں لیا جائے تاکہ ملک گیر سطح پر یکساں پالیسی اپنائی جا سکے۔

حکومتی ذرائع کا کہنا ہے کہ اس فیصلے پر عملدرآمد یقینی بنانے کے لیے انتظامیہ کو سخت ہدایات جاری کی جائیں گی۔ جلد ہی صوبائی حکومتوں اور تاجر تنظیموں کے نمائندوں کے ساتھ حتمی مشاورت مکمل کی جائے گی تاکہ دکانوں کی جلد بندش کے اوقات کار کو باقاعدہ قانونی شکل دی جا سکے۔