زہران ممدانی میئر کا الیکشن جیتا تو نیویارک کے فنڈ ز روک دوں گا، ٹرمپ کی دھمکی

نیویارک :  امریکی صدر ڈونلڈ ٹرمپ نے نیویارک سٹی کے میئر کے انتخابات میں سابق گورنر اینڈریو کومو کی مکمل حمایت کا اعلان کیا ہے، اور ساتھ ہی دھمکی دی ہے کہ اگر ڈیموکریٹ امیدوار زہران ممدانی جیتے تو وہ شہر کو وفاقی فنڈز روک دیں گے۔ ٹرمپ کا کہنا تھا کہ ممدانی کی فتح سے نیویارک سٹی میں کمیونسٹ نظریات کو تقویت ملے گی، جس کے نتیجے میں وہ شہر کو وفاقی فنڈز صرف قانونی حد تک فراہم کریں گے۔

ٹرمپ نے اپنے ٹرتھ سوشل اکاؤنٹ پر ایک بیان جاری کرتے ہوئے کہا، "چاہے آپ کو اینڈریو کومو پسند ہوں یا نہیں، آپ کو انہی کو ووٹ دینا ہوگا۔ امید ہے کہ وہ بہترین کارکردگی دکھائیں گے، جبکہ ممدانی ایسا نہیں کر سکتے۔" انہوں نے یہ بھی کہا کہ اگر ریپبلکن امیدوار کرٹس سلیوا کو ووٹ دیا گیا تو اس کا مطلب ممدانی کی مدد کرنا ہوگا۔

اس بیان کے بعد زہران ممدانی نے ٹرمپ کے موقف پر ردعمل ظاہر کرتے ہوئے کہا، "ٹرمپ اور کومو ایک جیسے ہیں، دونوں کی سوچ اور احساسِ برتری ایک جیسے ہیں۔" ممدانی نے مزید کہا کہ ٹرمپ کا کومو کی حمایت کرنا اس بات کی علامت ہے کہ وہ دونوں ایک ہی طرح کی سیاست کرتے ہیں۔

نیویارک سٹی کے مالی سال 2026 کے لیے وفاقی حکومت کی رپورٹ کے مطابق، شہر کو تقریباً 7.4 بلین ڈالر وفاقی فنڈز ملنے ہیں، جو اس کے کل اخراجات کا تقریباً 6.4 فیصد بنتے ہیں۔

اینڈریو کومو، جو سابقہ ڈیموکریٹک گورنر تھے، اب آزاد امیدوار کے طور پر انتخابات میں حصہ لے رہے ہیں۔ انہوں نے ممدانی کے مقابلے میں پارٹی کے اندرونی انتخابات ہارنے کے بعد یہ فیصلہ کیا ہے۔ دوسری طرف، ممدانی، جو یوگنڈا نژاد امریکی ہیں اور نیو یارک ریاست کی اسمبلی کے رکن بھی ہیں، نے اپنی مہم کے دوران نوجوانوں اور ترقی پسند حلقوں کو اپنی طرف متوجہ کیا ہے، تاہم ان کے سوشلسٹ نظریات نے معتدل ڈیموکریٹس اور کاروباری حلقوں میں تشویش پیدا کر دی ہے۔