خیبر پختونخوا میں 4.3 شدت کا زلزلہ، ملک میں زلزلے کی سرگرمیاں جاری

اسلام آباد: محکمہ موسمیات نے بتایا ہے کہ صوبہ خیبر پختونخوا کے مختلف علاقوں میں 4.3 شدت کا زلزلہ آیا ہے۔ زلزلہ رات 8 بج کر 59 منٹ پر پٹن کے جنوب مشرق میں 22 کلومیٹر کے فاصلے پر، 31 کلومیٹر گہرائی میں ریکارڈ کیا گیا۔

پاکستان تین بڑی ٹیکٹونک پلیٹوں (عربین، یورو-ایشین اور انڈین) کے سنگم پر واقع ہے، جس کی وجہ سے ملک میں پانچ زلزلہ خیز زونز موجود ہیں۔ ان کی وجہ سے خطے میں ٹیکٹونک حرکات اور زلزلے معمول کا حصہ ہیں۔

اس ہفتے کے آغاز میں کراچی کے مختلف علاقوں میں بھی 3.2 شدت کا زلزلہ محسوس کیا گیا تھا، جو ملیر کے شمال مغرب میں سات کلومیٹر کے فاصلے پر ریکارڈ ہوا تھا۔

گذشتہ ماہ ستمبر میں بھی خیبر پختونخوا کے چترال، پشاور اور سوات سمیت دیگر علاقوں میں 5.5 شدت کا زلزلہ آیا تھا۔

محکمہ موسمیات نے شہریوں کو محتاط رہنے کی ہدایت کی ہے اور کہا ہے کہ ملک بھر میں زلزلے کی ممکنہ سرگرمیوں پر نظر رکھی جارہی ہے۔