اسلام آباد میں باجوں کی فروخت اور استعمال پر پابندی، ضلعی انتظامیہ متحرک

اسلام آباد: ضلعی انتظامیہ اسلام آباد نے یومِ آزادی کے پیش نظر شہر بھر میں باجوں کی فروخت اور استعمال پر مکمل پابندی عائد کر دی ہے۔ اس حوالے سے ڈپٹی کمشنر (ڈی سی) اسلام آباد کی جانب سے تمام اسسٹنٹ کمشنرز اور مجسٹریٹس کو فوری ایکشن کی ہدایت جاری کر دی گئی ہے۔

ضلعی انتظامیہ کے مطابق، شہر کے مختلف علاقوں میں لگنے والے اسٹالز پر کڑی نگرانی کی جائے گی اور جس مقام سے باجے برآمد ہوں گے، اس علاقے کے متعلقہ افسر کو ذمہ دار ٹھہرایا جائے گا۔

ڈی سی اسلام آباد نے تمام افسران کو ہدایت کی ہے کہ وہ فوراً فیلڈ میں نکل کر روزانہ کی بنیاد پر کارروائیاں یقینی بنائیں۔ ان کا کہنا تھا کہ یہ کارروائیاں 14 اگست تک روزانہ جاری رہیں گی۔

انتظامیہ نے واضح کیا ہے کہ پابندی کی خلاف ورزی کرنے والوں کے خلاف سخت قانونی کارروائی عمل میں لائی جائے گی اور کسی کو بھی شہریوں کے سکون کو متاثر کرنے کی اجازت نہیں دی جائے گی۔

یاد رہے کہ باجوں کا شور یومِ آزادی کے قریب شہری علاقوں میں noise pollution (شور کی آلودگی) اور امن و امان کے مسائل کا باعث بنتا ہے، جس پر شہریوں کی جانب سے مسلسل شکایات سامنے آتی رہی ہیں۔