وائبز فیچر کی مقبولیت پر میٹا کا الگ ایپ لانچ کرنے کا فیصلہ

کیلیفورنیا: میٹا اپنی ٹیکسٹ ٹو ویڈیو سروس "وائبز" کے لیے ایک خودمختار ایپ تیار کرنے پر کام کر رہا ہے۔ یہ ایپ مصنوعی ذہانت کی مدد سے بنائی گئی ویڈیوز کی سہولت فراہم کرے گی۔

ٹیک کرنچ کی رپورٹ کے مطابق، ستمبر 2025 میں وائبز کو میٹا اے آئی ایپ کے ایک فیچر کے طور پر متعارف کرایا گیا تھا، جس میں صارفین اپنی مرضی کے مطابق ہدایات دے کر ٹک ٹاک جیسے ویڈیوز تخلیق کر سکتے ہیں۔

میٹا نے اعلان کیا ہے کہ صارفین کی مثبت رائے کو دیکھتے ہوئے وہ وائبز کے لیے الگ ایپ کی آزمائش شروع کر چکے ہیں۔ کمپنی کا کہنا ہے کہ لوگ اس فیچر کو بہت زیادہ استعمال کر رہے ہیں اور دوستوں کے ساتھ ویڈیوز شیئر کر رہے ہیں۔

یہ نئی ایپ صارفین کو ایک مستقل پلیٹ فارم فراہم کرے گی جہاں وہ وائبز کی خدمات کو آسانی سے استعمال کر سکیں گے۔ اگرچہ میٹا نے وائبز کے صارفین کی تعداد ظاہر نہیں کی، مگر کہا گیا ہے کہ اس فیچر کی آمد سے میٹا اے آئی کے صارفین میں اضافہ ہوا ہے۔

میٹا کا ماننا ہے کہ مصنوعی ذہانت کی مدد سے بننے والا مواد مستقبل میں سوشل میڈیا کا اہم حصہ ہوگا اور اکتوبر 2025 میں کمپنی نے اعلان کیا تھا کہ وہ مزید AI تصاویر اور ویڈیوز کو اپنے الگورتھمز میں شامل کرے گی۔