شیخ رشید نے حنیف عباسی کو وزیراعظم کا معاون خصوصی بنانے کا اقدام چیلنج کر دیا

اسلام آباد: سابق وفاقی وزیر داخلہ شیخ رشید نے پاکستان مسلم لیگ (ن) کے رہنماءحنیف عباسی کو وزیراعظم شہباز شریف کا معاون خصوصی بنانے کا اقدام ہائیکورٹ میں چیلنج کر دیا ہے۔ 
تفصیلات کے مطابق عوامی مسلم لیگ کے سربراہ شیخ رشید نے حنیف عباسی کو وزیراعظم کا معاون خصوصی بنائے جانے کے خلاف اسلام آباد ہائیکورٹ میں درخواست جمع کرائی جس میں وفاق کو بذریعہ سیکرٹری اور حنیف عباسی کو فریق بنایا گیا ہے۔

حنیف عباسی کو وزیراعظم کا معاون خصوصی بنانے کے اقدام کو سابق وفاقی وزیر داخلہ شیخ رشید احمد نے اسلام آباد ہائی کورٹ میں چیلنج کر دیا pic.twitter.com/qLByq1qq52

— Sheikh Rashid Ahmed (@ShkhRasheed) May 6, 2022

درخواست میں موقف اختیار کیا گیا ہے کہ حنیف عباسی کے خلاف 21 جولائی 2012ءمیں اینٹی نارکوٹکس فورس نے مقدمہ درج کیا، وہ ایفی ڈرین کوٹہ کیس میں سزا یافتہ ہیں، انہیں ٹرائل کورٹ نے 21 جولائی 2018 کو سزا سنائی۔
درخواست میں مزید کہا گیا ہے کہ لاہور ہائیکورٹ نے ٹرائل کورٹ کی سزا معطل کر رکھی ہے لیکن مجرم ہونے کا فیصلہ ختم نہیں ہوا، سیکرٹری کابینہ اورحنیف عباسی بتائیں کہ کس قانون کے تحت انہیں اس عہدے پرتعینات کیا گیا۔