ایم کیو ایم کا وزیراعظم شہباز شریف سے 27 ویں آئینی ترمیم میں بلدیاتی حکومتوں کو اختیارات دینے کا مطالبہ

اسلام آباد: ایم کیو ایم پاکستان نے وزیراعظم محمد شہباز شریف سے ملاقات کے دوران 27 ویں آئینی ترمیم میں بلدیاتی حکومتوں کو مزید اختیارات دینے کا مطالبہ کیا ہے۔ ایم کیو ایم کے 7 رکنی وفد نے وزیراعظم ہاؤس میں وزیراعظم سے ملاقات کی جس کی قیادت پارٹی کے کنوینر ڈاکٹر خالد مقبول صدیقی نے کی۔

وفد میں گورنر سندھ کامران خان ٹیسوری، وفاقی وزیر صحت سید مصطفیٰ کمال، اراکین قومی اسمبلی ڈاکٹر فاروق ستار، جاوید حنیف خان، سید امین الحق اور خواجہ اظہار الحسن بھی شامل تھے۔ ملاقات میں ایم کیو ایم رہنماؤں نے وزیراعظم شہباز شریف سے مطالبہ کیا کہ 27 ویں آئینی ترمیم میں مقامی حکومتوں کو مزید اختیارات دیے جائیں تاکہ بلدیاتی سطح پر حکومتی امور کی بہتر انجام دہی ممکن ہو سکے۔

ذرائع کے مطابق، وزیراعظم شہباز شریف نے اس حوالے سے ایم کیو ایم کے بلدیاتی آئینی ترمیمی مسودے کو 27 ویں ترمیم میں شامل کرنے کی یقین دہانی کرائی۔ اس کے علاوہ، ایم کیو ایم رہنماؤں نے ملاقات میں وزیر اعظم سے درخواست کی کہ مسلم لیگ ن کی حمایت سے یہ بلدیاتی مسودہ آئینی ترمیم کا حصہ بنے۔

گورنر سندھ کامران ٹیسوری نے ملاقات کے بعد میڈیا سے بات کرتے ہوئے کہا کہ وزیراعظم نے 27 ویں آئینی ترمیم پر ایم کیو ایم کے وفد کو اعتماد میں لیا ہے۔ انہوں نے بتایا کہ اس آئینی ترمیم میں بلدیاتی مسودے کے حوالے سے مکمل مشاورت کی گئی ہے۔

ایم کیو ایم ذرائع کا کہنا ہے کہ 27 ویں آئینی ترمیم میں ان کے بلدیاتی مسودے کی شمولیت مسلم لیگ ن کی مکمل حمایت سے ممکن ہو گی اور یہی پارٹی کی سب سے بڑی ترجیح ہے۔ حکومتی اتحاد نے 27 ویں آئینی ترمیم پیش کرنے کی تیاری مکمل کر لی ہے، اور ذرائع کا کہنا ہے کہ یہ ترمیم رواں ماہ پارلیمنٹ کے دونوں ایوانوں سے منظور کرائی جائے گی۔

ایم کیو ایم کے مطالبے کی اگر منظوری ملتی ہے تو اس سے مقامی حکومتوں کو مضبوط بنانے اور شہری علاقوں میں حکومتی خدمات کی بہتری کی راہ ہموار ہو سکتی ہے، جس کا فائدہ عوام کو حاصل ہو گا۔