مذاکرات ناکام ہوئے تو غزہ میں لڑائی پھر شروع کر دیں گے ، اسرائیلی آرمی چیف کی دھمکی

تل ابیب : اسرائیل کے فوجی سربراہ جنرل ایال ضمیر نے خبردار کیا ہے کہ اگر حماس کے ساتھ یرغمالیوں کی رہائی کے لیے جاری مذاکرات ناکام رہتے ہیں تو فوج دوبارہ غزہ میں وسیع کارروائی شروع کر دے گی۔ انہوں نے کمانڈروں سے خطاب میں کہا کہ موجودہ صورتحال جنگ بندی نہیں بلکہ آپریشنل حکمتِ عملی میں تبدیلی ہے۔

جنرل ضمیر کا کہنا تھا کہ عسکری کارروائیوں سے حاصل کی گئی کامیابیاں سیاسی مذاکرات میں فائدے کے لیے استعمال کی جا رہی ہیں، اور اگر سیاسی راستہ کام نہ آیا تو فوج دوبارہ لڑائی میں واپس آ جائے گی۔ انہوں نے مزید کہا کہ اسرائیل جارحانہ انداز میں کارروائیاں جاری رکھے ہوئے ہے، دشمن کو ہر محاذ پر کمزور کر رہا ہے اور خطے میں حقیقت بدل رہی ہے۔

یہ بیان ایسے وقت میں سامنے آیا ہے جب اسرائیل اور حماس کے درمیان بقیہ یرغمالیوں کی رہائی کے سلسلے میں مذاکرات متوقع ہیں۔ اس سے قبل امریکی صدر نے بھی خبردار کیا تھا کہ اگر حماس غزہ کا کنٹرول ترک نہ کرے تو اسے مکمل طور پر ختم کرنے تک کی دھمکی دی جا سکتی ہے۔