ممبئی: بالی وڈ کے اداکار فردین خان نے 14 برس بعد اداکاری کی دنیا میں واپسی کرلی۔فردین خان نے فلمساز سنجے لیلا بھنسالی کی ویب سیریز ‘ہیرا منڈی: دی ڈائمنڈ بازار’ سے اداکاری کی دنیا میں واپسی کی ہے۔ اداکاری کی واپسی کی خبر او ٹی ٹی پلیٹ فارم ‘نیٹ فلکس انڈیا’ نے اپنے آفیشل انسٹاگرام پر ایک پوسٹر کے ذریعے دی۔پوسٹر میں فردین خان کو ولی محمد کے کردار میں دکھایا گیا ہے جوکہ وہ ویب سیریز ‘ہیرا منڈی: دی ڈائمنڈ بازار’ میں نبھائیں گے۔
فردین خان کی پہلی جھلک میں وہ ثقافتی شاہی لباس میں ملبوس ہیں، وہ چہرے پر بڑی مونچھوں اور سر پر ٹوپی پہنے تخت پر بیٹھے ہیں۔
واضح رہے کہ ‘ہیرا منڈی: دی ڈائمنڈ بازار’ کو 1940 کے دور میں سیٹ کیا گیا ہے اور اس میں دربار والوں اور طوائفوں کے درمیان تعلقات پر کہانی کی بنیاد رکھی گئی ہے۔ویب سیریز کی میگا کاسٹ میں سوناکشی سنہا، منیشا کوئرالہ، اآدتیہ راؤ حیدری، ریچا چڈھا، سنجیدا شیخ اور شرمین سیگل شامل ہیں۔
سنجے لیلا بھنسالی کی پہلی مہاکاوی، شاندار سیریز ‘ہیرامنڈی: دی ڈائمنڈ بازار’ یکم مئی کو صرف نیٹ فلکس پر ریلیز ہوگی۔
