ڈیرہ اسماعیل خان : ڈیرہ اسماعیل خان کے علاقے تکواڑہ میں سکیورٹی فورسز نے انٹیلی جنس کی بنیاد پر آپریشن کیا، جس کے نتیجے میں 9 دہشت گردوں کو ہلاک کر دیا گیا۔ پاک فوج کے شعبہ تعلقات عامہ (آئی ایس پی آر) کے مطابق، آپریشن کے دوران سکیورٹی فورسز نے خوارج کے ٹھکانے کو مؤثر انداز میں نشانہ بنایا، جس کے بعد شدید فائرنگ کے تبادلے میں 9 دہشت گرد مارے گئے۔
ترجمان پاک فوج نے بتایا کہ ہلاک ہونے والوں میں ایک انتہائی مطلوب خارجی سرغنہ شیرین بھی شامل تھا۔ اس کے علاوہ، مارے گئے دہشت گردوں سے اسلحہ اور گولہ بارود بھی برآمد ہوا۔ شیرین پر متعدد دہشت گرد کارروائیوں میں ملوث ہونے کا الزام تھا، جن میں 20 مارچ 2025 کو کیپٹن حسنین اختر شہید کی شہادت بھی شامل ہے۔
آئی ایس پی آر کے مطابق، یہ آپریشن اس سنگین جرم کا بدلہ لینے کے طور پر انجام پایا ہے اور شیرین جیسے مرکزی مجرم کو اس کے انجام تک پہنچا دیا گیا ہے۔ سکیورٹی فورسز نے بتایا کہ علاقے میں سرچ اور کلیئرنس آپریشن جاری ہے تاکہ اگر کوئی دہشت گرد بچا ہو تو اُسے بھی گرفتار کیا جا سکے۔ پاک فوج دہشت گردی کے مکمل خاتمے کے لیے پرعزم ہے۔
