موٹروے پولیس کی شدید دھند کے پیشِ نظر مسافروں کے لیے ٹریول ایڈوائزری جاری

لاہور : نیشنل ہائی ویز اینڈ موٹروے پولیس نے پنجاب، خیبر پختونخوا اور سندھ کے مختلف علاقوں میں شدید دھند کے باعث مسافروں کے لیے تفصیلی ٹریول ایڈوائزری جاری کر دی ہے۔ موٹروے پولیس کے ترجمان کے مطابق، دھند کی شدت کی وجہ سے قومی شاہراہوں اور موٹروے پر حدِ نگاہ بہت کم ہو جاتی ہے، جس کے نتیجے میں حادثات کا خطرہ بڑھ جاتا ہے۔ اس صورتحال میں متعلقہ موٹروے سیکشنز کو عارضی طور پر بند بھی کیا جا سکتا ہے تاکہ مسافروں کی حفاظت کو یقینی بنایا جا سکے۔

موٹروے پولیس نے مسافروں سے درخواست کی ہے کہ وہ صبح 10 بجے سے شام 8 بجے کے درمیان سفر مکمل کریں اور رات کے وقت غیر ضروری سفر سے گریز کریں۔ ترجمان نے یہ بھی کہا کہ سفر کے دوران ڈرائیورز کو اپنی گاڑیوں میں فوگ لائٹس کا استعمال لازمی کرنا چاہیے، وائپرز کو درست حالت میں رکھنا چاہیے، اور اگلی گاڑی سے زیادہ فاصلہ رکھنا ضروری ہے۔ ہائی بیم لائٹس کا استعمال ہرگز نہ کریں کیونکہ اس سے حدِ نگاہ مزید کم ہو سکتی ہے۔

موٹروے پولیس نے مسافروں کو مشورہ دیا ہے کہ وہ سفر شروع کرنے سے قبل تازہ ترین صورتحال جاننے کے لیے ہیلپ لائن نمبر 130، ایف ایم 95 ریڈیو اور سوشل میڈیا کا استعمال کریں تاکہ سفر کے دوران کوئی غیر متوقع صورتحال پیش نہ آئے۔ ترجمان نے کہا کہ عوام کی جان و مال کی حفاظت موٹروے پولیس کی اولین ترجیح ہے اور اس مقصد کے لیے تمام ضروری اقدامات کیے جا رہے ہیں۔

موٹروے پولیس کی ٹیمیں 24 گھنٹے چوکس رہ کر اس حوالے سے کارروائی کر رہی ہیں تاکہ سفر کرنے والوں کو کسی قسم کی مشکلات کا سامنا نہ ہو۔