اسلام آباد: وزیرِاعظم شہباز شریف نے کہا ہے کہ الحمد للہ، ملکی معیشت درست سمت میں ترقی کر رہی ہے، اور اس میں شرح سود اور مہنگائی کی شرح میں نمایاں کمی آئی ہے۔ وزیرِ اعظم سے ملاقات کرنے والے کاروباری شخصیات کے وفد نے ان کی قیادت میں حکومت کی پالیسیوں پر اعتماد کا اظہار کیا ہے۔
وزیرِ اعظم نے کہا کہ مخلص اور دیانتدار کاروباری برادری ملکی معیشت کا اہم اثاثہ ہے، اور آپ سب نے مشکل حالات میں بھی اپنی سرمایہ کاری ملک میں کی جس سے معیشت کو استحکام ملا۔ انہوں نے مزید کہا کہ کاروباری شخصیات کی مشاورت اور آراء کے ذریعے ہم معیشت کی بہتری کے لیے مزید اصلاحات پر کام کریں گے۔
وفد میں مشاہد حسین، ایس ایم تنویر، میاں احسن، سلیم غوری، گوہر اعجاز، سید یاور علی، عاطف شیخ، فواد مختار، شہزاد ملک، عثمان ملک، عاطف انعام اور شہزاد اصغر شامل تھے۔
وزیرِ اعظم نے اس بات پر بھی زور دیا کہ ملک کی معیشت کی ترقی کے لیے مقامی سرمایہ کاروں کا کردار اہم ہے، اور ٹریڈ افسران کو تجارت اور برآمدات کے فروغ کے لیے واضح اہداف دیے جا چکے ہیں۔
