غزہ بورڈ آف پیس کی پہلی میٹنگ واشنگٹن میں 19 فروری کو ہوگی

واشنگٹن : غزہ بورڈ آف پیس کی پہلی میٹنگ رواں ماہ کی 19 تاریخ کو واشنگٹن میں منعقد کی جائے گی، جس کی تیاری مکمل کر لی گئی ہے۔ امریکی میڈیا کے مطابق، اس میٹنگ کے لیے تمام ارکان کو دعوت نامے ارسال کر دیے گئے ہیں، اور میٹنگ کی میزبانی امریکی صدر ڈونلڈ ٹرمپ، بورڈ ممبران اور غزہ ایگزیکٹو کمیٹی کے ارکان کریں گے۔ امریکی صدر ٹرمپ اس بورڈ کے چیئرمین ہیں۔

غزہ بورڈ آف پیس کا مقصد حماس کو غیر مسلح کرنا اور غزہ کی تعمیر نو ہے۔ تاہم، برطانیہ، فرانس اور ناروے سمیت اہم یورپی ممالک نے بورڈ میں شامل ہونے سے انکار کیا ہے اور اس کی تشکیل کو اقوام متحدہ کی حیثیت کو چیلنج کرنے کے مترادف قرار دیا ہے۔

میٹنگ کا ایجنڈا ابھی تک سامنے نہیں آیا، مگر امریکی میڈیا کے مطابق غزہ بورڈ کا قیام صدر ٹرمپ کی پیش کردہ غزہ ڈیل کے دوسرے حصے کے طور پر دیکھا جا رہا ہے۔

دلچسپ بات یہ ہے کہ پاکستان سمیت 25 ممالک نے غزہ بورڈ آف پیس میں شمولیت اختیار کر رکھی ہے، جبکہ اسرائیلی وزیراعظم نے بھی ابتدا میں تنقید کے باوجود بورڈ کا حصہ بننے کی آمادگی ظاہر کر دی ہے۔یہ میٹنگ اور بورڈ کی تشکیل عالمی سطح پر اہمیت اختیار کر گئی ہے، خاص طور پر اس کے اثرات غزہ اور مشرق وسطیٰ کے امن عمل پر مرتب ہو سکتے ہیں۔