عازمین حج کے لیے بائیو میٹرک کرانے کا آج آخری روز

اسلام آباد : پاکستان میں عازمین حج کے لیے بائیو میٹرک کرانے کا آج آخری دن ہے۔ وزارت مذہبی امور کے ترجمان کے مطابق جو عازمین حج بائیو میٹرک مکمل نہیں کریں گے، وہ رواں برس حج پر نہیں جا سکیں گے۔

عازمین حج کی سہولت کے لیے سعودی ویزا بائیو ایپ کا استعمال کیا جا رہا ہے، جس کے ذریعے موبائل فون سے گھر بیٹھے ہی بائیو میٹرک کرایا جا سکتا ہے۔ اس کے علاوہ، تاشیر سینٹرز بھی آج شام 5 بجے تک کھلے رہیں گے تاکہ رش سے بچا جا سکے اور لوگ بآسانی یہ عمل مکمل کر سکیں۔

وزارت مذہبی امور نے اس بات پر زور دیا ہے کہ بائیو میٹرک کرائے بغیر عازمین کے پاسپورٹ پر حج ویزا نہیں لگے گا۔ اس کے ساتھ ہی 80 سال سے زائد عمر کے عازمین حج کو بائیو میٹرک سے مستثنیٰ قرار دیا گیا ہے، اور ان کے لیے صرف پاسپورٹ سکین اور تصدیقی ای میل کی ضرورت ہوگی۔

وزارت نے عازمین حج کو ہدایت کی ہے کہ سعودی ویزا بائیو ایپ کے ذریعے فنگر پرنٹس مکمل کر کے پروسیس کو جلدی مکمل کریں، تاکہ حج کی تیاریوں میں کوئی دشواری نہ ہو۔