پاکستان میں شفافیت میں اضافہ، کرپشن میں کمی، معیشت استحکام کی طرف بڑھ رہی ہے، ٹرانسپیرنسی انٹرنیشنل رپورٹ

اسلام آباد: ٹرانسپیرنسی انٹرنیشنل کی حالیہ رپورٹ کے مطابق، پاکستان میں شفافیت میں واضح اضافہ ہوا ہے اور کرپشن کی سطح میں کمی آئی ہے، جس کے نتیجے میں ملک کی معیشت استحکام کی طرف گامزن ہے۔ این سی پی ایس 2025ء کے تحت جاری کردہ رپورٹ میں بتایا گیا ہے کہ 66 فیصد پاکستانیوں نے کہا ہے کہ انہیں کسی سرکاری کام کے لیے رشوت نہیں دینی پڑی، جو کہ ایک اہم پیشرفت ہے۔

رپورٹ میں یہ بھی ذکر کیا گیا کہ حکومت کی جانب سے آئی ایم ایف کے ساتھ معاہدے نے ملکی معیشت کو مستحکم کیا ہے اور اس کے اثرات واضح طور پر نظر آ رہے ہیں۔ ٹرانسپیرنسی انٹرنیشنل نے اس بات پر زور دیا کہ ایف اے ٹی ایف کی گرے لسٹ سے پاکستان کا نکلنا بھی معاشی استحکام کا سبب بنا ہے، جس سے ملک کی عالمی سطح پر مالیاتی پوزیشن مضبوط ہوئی ہے۔

رپورٹ کے مطابق، پولیس کے حوالے سے عوامی رائے میں بھی مثبت تبدیلی آئی ہے، جو کہ پولیس کے رویے اور سروس ڈلیوری میں بہتری کی عکاسی کرتی ہے۔ عوامی تاثر میں بہتری تعلیم، زمین و جائیداد اور ٹیکسیشن کے شعبوں میں بھی دیکھنے کو ملی ہے، جو کہ حکومتی اصلاحات کا نتیجہ ہیں۔