عمر کی نہیں، لگن کی ضرورت ہے، 55 سالہ فیض الحق نے میٹرک کا امتحان پاس کرلیا

پشین : پشین سے تعلق رکھنے والے 55 سالہ فیض الحق نے تعلیم کے میدان میں نئی مثال قائم کی ہے۔ انہوں نے زندگی کے اس سنگ میل کو عبور کرتے ہوئے میٹرک کا امتحان 600 نمبر لے کر سیکنڈ ڈویژن میں پاس کیا۔ فیض الحق گورنمنٹ بوائز ہائی سکول نوآباد میں بطور چپڑاسی کام کر رہے ہیں، لیکن ان کی تعلیم کے لئے لگن اور جذبہ کسی بھی عمر کی رکاوٹ سے آزاد ہے۔

فیض الحق نے بتایا کہ بچپن سے ہی انہیں تعلیم کا شوق تھا لیکن گھر کی کفالت کے ذمہ داریوں کی وجہ سے وہ پڑھائی میں اپنا وقت نہیں دے سکے۔ تاہم، سکول کے اساتذہ اور عملے کی حوصلہ افزائی اور سپورٹ نے ان کی میٹرک کرنے کی خواہش کو حقیقت میں بدل دیا۔

ان کی کامیابی پر سکول کے اساتذہ اور عملے نے ان کا بھرپور استقبال کیا اور انہیں پھولوں کے ہار پہنائے۔ یہ لمحہ فیض الحق کے لئے نہ صرف ذاتی کامیابی تھا بلکہ انہوں نے یہ ثابت کیا کہ کسی بھی عمر میں تعلیم حاصل کی جا سکتی ہے، بس ضرورت ہے تو صرف لگن اور محنت کی۔

یہ کہانی ایک مثال ہے کہ تعلیم کے لئے عمر کی کوئی قید نہیں ہوتی، بس ضرورت ہے تو سچے جذبے اور عزم کی۔