ایرانی حملے میں اسرائیلی وزیراعظم کا گھر نشانہ، اہم ہلاکت کا خدشہ:سابق امریکی انٹیلی جنس افسر کا بڑا دعویٰ

نیویارک : سابق امریکی انٹیلی جنس افسر سکاٹ رِٹر نے دعویٰ کیا ہے کہ ایران نے اسرائیل کے خلاف اپنی جنگی حکمتِ عملی تبدیل کرتے ہوئے اہم سیاسی اہداف کو نشانہ بنانا شروع کر دیا ہے۔ ایک حالیہ انٹرویو میں انہوں نے انکشاف کیا ہے کہ ایرانی حملوں میں اسرائیلی وزیراعظم بنیامین نیتن یاہو کی رہائش گاہ کو بھی نشانہ بنایا گیا ہے۔
سکاٹ رِٹر کے مطابق ایران کے ان تازہ حملوں کا رُخ اسرائیل کی اہم شخصیات کے گھروں کی جانب تھا۔ انہوں نے اپنے انٹرویو میں درج ذیل سنسنی خیز دعوے کیے۔ ایرانی حملے میں اسرائیلی وزیراعظم کی رہائش گاہ کو براہِ راست نشانہ بنایا گیا، جس میں مبینہ طور پر وزیراعظم کا بھائی مارا گیا ہے۔
 ایران نے اسرائیل کے وزیرِ قومی سلامتی ایتامار بن گویر کے گھر پر بھی مبینہ طور پر حملے کیے ہیں۔سکاٹ رِٹر کا کہنا ہے کہ ایران نے اب اپنی حکمتِ عملی بدل دی ہے اور وہ اسرائیل کی حساس ترین تنصیبات کے بجائے براہِ راست ان کے اہم رہنماؤں  کو نشانہ بنا رہا ہے۔
سابق انٹیلی جنس افسر کا ماننا ہے کہ ایران کی جانب سے ان اہم اہداف کو نشانہ بنانا اس بات کا ثبوت ہے کہ تہران اب اسرائیل کو یہ باور کرانا چاہتا ہے کہ ان کی اعلیٰ ترین قیادت بھی محفوظ نہیں ہے۔
سکاٹ رِٹر کے اس بیان نے بین الاقوامی میڈیا اور سوشل میڈیا پر ایک نئی بحث چھیڑ دی ہے۔ اگرچہ اسرائیلی حکام کی جانب سے اس جانی نقصان کی باضابطہ تصدیق یا تردید سامنے نہیں آئی، تاہم ماہرین اس بیان کو خطے میں بڑھتی ہوئی کشیدگی کا ایک نیا رخ قرار دے رہے ہیں۔