چار ملکی فٹبال ٹورنامنٹ میں پاکستان کی فتح، وزیراعظم شہباز شریف کی ٹیم کو مبارکباد

اسلام آباد: پاکستان نے چار ملکی فٹبال ٹورنامنٹ میں شاندار کارکردگی کا مظاہرہ کرتے ہوئے کامیابی حاصل کر لی ہے۔ قومی ٹیم کی فتح پر وزیراعظم شہباز شریف نے کھلاڑیوں کو مبارکباد دیتے ہوئے اسے تاریخی کامیابی قرار دیا ہے۔

وزیراعظم نے اپنے بیان میں کہا کہ قومی ٹیم نے بہترین کھیل، عزم اور ٹیم ورک کے ذریعے ملک کا نام روشن کیا ہے۔ انہوں نے کہا کہ یہ کامیابی پوری قوم کے لیے باعثِ فخر ہے۔

شہباز شریف کے مطابق یہ پاکستان کی تاریخ کا پہلا باضابطہ بین الاقوامی فٹبال ٹورنامنٹ ٹائٹل ہے، جو کھیلوں کے فروغ اور نوجوان کھلاڑیوں کے لیے ایک اہم سنگِ میل کی حیثیت رکھتا ہے۔

وزیراعظم نے کہا کہ حکومت کھیلوں کے فروغ کے لیے اقدامات جاری رکھے گی اور قومی ٹیموں کو ہر ممکن سہولت فراہم کی جائے گی تاکہ وہ بین الاقوامی سطح پر مزید کامیابیاں حاصل کر سکیں۔