انڈونیشیا کے صوبہ پاپوا میں 6.3 شدت کا زلزلہ، سونامی کا خطرہ مسترد

جکارتہ: انڈونیشیا کے مشرقی صوبے پاپوا میں منگل کو 6.3 شدت کا زلزلہ آیا، تاہم پیسفک سونامی وارننگ سینٹر نے فوری طور پر سونامی کے خدشات کو مسترد کر دیا ہے۔

امریکی جیولوجیکل سروے (USGS) کے مطابق یہ زلزلہ مقامی وقت شام 5 بج کر 24 منٹ پر ابی پورا سے تقریباً 193 کلومیٹر شمال مغرب میں آیا۔ ابتدائی طور پر اس کی شدت 6.5 بتائی گئی تھی، جسے بعد میں 6.3 کر دیا گیا۔اب تک کسی جانی یا مالی نقصان کی کوئی اطلاع موصول نہیں ہوئی۔

انڈونیشیا بحرالکاہل کے "رِنگ آف فائر" خطے میں واقع ہے، جہاں ٹیکٹونک پلیٹوں کی حرکت کے باعث زلزلے اور آتش فشانی کے واقعات اکثر پیش آتے ہیں۔ گزشتہ دہائیوں میں آچے اور سولاویسی جیسے علاقوں میں شدید زلزلوں اور سونامی نے بھاری جانی و مالی نقصان پہنچایا ہے۔