اعلیٰ عدلیہ کے ججز کے خطوط پر غور، سپریم جوڈیشل کونسل کا اہم اجلاس آج ہوگا

اسلام آباد: سپریم جوڈیشل کونسل کا اہم اجلاس آج چیف جسٹس آف پاکستان جسٹس یحییٰ آفریدی کی سربراہی میں منعقد ہوگا۔ اجلاس میں سپریم کورٹ کے سینئر ججز جسٹس منصور علی شاہ اور جسٹس منیب اختر کے علاوہ لاہور ہائیکورٹ کی چیف جسٹس عالیہ نیلم اور سندھ ہائیکورٹ کے چیف جسٹس جنید غفار بھی شریک ہوں گے۔

ذرائع کے مطابق اجلاس میں ججز کے خلاف موصول شکایات، عدالتی رولز اور عدالتی کوڈ آف کنڈکٹ پر تفصیلی غور کیا جائے گا، خاص طور پر اعلیٰ عدلیہ کے ججز کی جانب سے تحریر کردہ خطوط کی روشنی میں۔

یہ اجلاس عدالتی شفافیت اور معیار کو برقرار رکھنے کے حوالے سے نہایت اہم ہے اور ججز کی پیشہ ورانہ صلاحیتوں اور رویے پر بھی تبادلہ خیال کیا جائے گا۔

سپریم جوڈیشل کونسل عدلیہ کی مضبوطی اور عوامی اعتماد کو بڑھانے کے لیے ججز کی کارکردگی کی جانچ اور شکایات کی سماعت کا مجاز قانونی ادارہ ہے۔