فیفا ورلڈ کپ 2026: فیس بک، انسٹاگرام اور واٹس ایپ میں فٹبال کے خصوصی فیچرز متعارف

کیلیفورنیا:  فیفا ورلڈ کپ 2026 کے موقع پر Meta (میٹا پلیٹ فارمز) نے اپنی مختلف ایپس میں فٹبال سے متعلق نئے فیچرز متعارف کرانے کا اعلان کیا ہے جن میں Instagram (انسٹاگرام)، Facebook (فیس بک)، WhatsApp (واٹس ایپ)، Threads (تھریڈز) اور Messenger (میسنجر) شامل ہیں۔ ان فیچرز کے لیے میٹا نے براڈکاسٹرز، ٹیموں، کھلاڑیوں، کمنٹیٹرز اور کریٹرز کے ساتھ شراکت داری بھی کی ہے تاکہ صارفین کو زیادہ بہتر اور انٹرایکٹو تجربہ دیا جا سکے۔

ان اپ ڈیٹس کے ذریعے صارفین کو لائیو اسکورز، ریئل ٹائم چیٹ، فٹبال کمیونٹیز، تھیمز اور اے آئی پر مبنی ٹولز تک رسائی حاصل ہوگی، جس کا مقصد ورلڈ کپ سے متعلق مواد کو آسان اور فوری بنانا ہے۔

Threads (تھریڈز) میں فٹبال ورلڈ کپ کے حوالے سے لائیو چیٹ فیچر متعارف کرایا جا رہا ہے جس میں شائقین براہِ راست گفتگو کر سکیں گے، جبکہ اس گفتگو کی میزبانی فٹبال شخصیات کریں گی۔ یہاں ایک فٹبال کمیونٹی بھی بنائی جا رہی ہے جہاں میچ کے دن صارفین آپس میں بات چیت اور معلومات شیئر کر سکیں گے۔ اس کے ساتھ لائیو اسکور ٹریکنگ، ٹیم سپورٹ فلیئرز اور فٹبال تھیم ایموجیز و اسٹیکرز بھی شامل ہوں گے۔

Instagram (انسٹاگرام) اور Facebook (فیس بک) میں ایک ورلڈ کپ ہب شامل کیا جا رہا ہے جہاں ریلز، اسٹوریز، براڈکاسٹر کوریج اور ٹیموں کی اپ ڈیٹس دیکھی جا سکیں گی۔ انسٹاگرام پر اے آئی پر مبنی “گول” وائس ایفیکٹ بھی ڈائریکٹ میسجز کے لیے آئے گا، جبکہ فٹبال تھیم اینیمیشنز بھی دستیاب ہوں گی۔

Facebook (فیس بک) میں ایک خاص فٹبال موڈ بھی شامل کیا گیا ہے جسے ایپ لوگو پر دو بار کلک کرکے ایکٹیویٹ کیا جا سکے گا۔ اس موڈ میں تھیمز، ری ایکشنز، سرپرائز فیچرز اور ایک فٹبال گیم بھی شامل ہوگی۔ اس کے علاوہ میٹا اے آئی کا “ویئر اٹ” فیچر بھی دیا جا رہا ہے جس سے صارفین اپنی پسندیدہ ٹیم کی جرسی ورچوئلی پہن کر دیکھ سکیں گے۔

Messenger (میسنجر) اور WhatsApp (واٹس ایپ) میں بھی فٹبال سے متعلق نئے فیچرز شامل کیے جا رہے ہیں۔ میسنجر میں لائیو میچ اپ ڈیٹس جیسے گول اور ریڈ کارڈز گروپ چیٹس میں براہِ راست شیئر ہوں گے، جبکہ فٹبال تھیم بیک گراؤنڈز اور اینیمیٹڈ اسٹیکرز بھی دستیاب ہوں گے۔ واٹس ایپ میں عارضی طور پر فٹبال ایموجی کو آفیشل میچ بال سے تبدیل کیا جا رہا ہے، ساتھ ہی ویڈیو کال ایفیکٹس، اسٹیکرز اور فٹبال ڈکشنری بھی شامل ہوگی جس میں اسکورز اور ٹیم اپ ڈیٹس کی معلومات موجود ہوں گی۔