سہیل خان کی کمزور صحت کی تصاویر سامنے آگئیں، مداح تشویش میں مبتلا

ممبئی : بالی ووڈ اداکار اور سلمان خان کے بھائی سہیل خان کی حالیہ تصاویر اور ویڈیوز سوشل میڈیا پر گردش کر رہی ہیں، جن میں ان کی صحت پہلے کے مقابلے میں کمزور دکھائی دے رہی ہے۔ ان مناظر کے سامنے آنے کے بعد مداحوں کی جانب سے تشویش کا اظہار کیا جارہا ہے۔

سوشل میڈیا صارفین سہیل خان کی ظاہری حالت پر مختلف آرا پیش کر رہے ہیں۔ بعض افراد نے اسے عمر یا صحت سے متعلق مسائل سے جوڑا، جبکہ کچھ صارفین نے قیاس کیا کہ ممکنہ طور پر جم اور سپلیمنٹس کے اثرات بھی اس کی وجہ ہوسکتے ہیں۔

کچھ مداحوں نے سہیل خان کی ذاتی زندگی میں آنے والی تبدیلیوں کا بھی ذکر کیا، تاہم ان دعوؤں کی کوئی تصدیق سامنے نہیں آئی۔ بیشتر صارفین نے اداکار کی صحت یابی کے لیے دعائیں اور نیک خواہشات کا اظہار کیا۔

مداحوں کی ایک بڑی تعداد نے دوسروں سے اپیل کی ہے کہ سہیل خان کی صحت کے بارے میں غیر مصدقہ باتوں کو پھیلانے سے گریز کیا جائے اور انہیں غیر ضروری تنقید یا ٹرولنگ کا نشانہ نہ بنایا جائے۔

اس سے قبل سلمان خان کی صحت سے متعلق بھی کچھ تصاویر سوشل میڈیا پر زیرِ گردش رہی تھیں، جس کے بعد اداکار نے اپنی نئی تصاویر شیئر کرکے مداحوں کو اپنی خیریت سے آگاہ کیا تھا۔

واضح رہے کہ سہیل خان اور سیما ساجدیہ کی شادی 1998 میں ہوئی تھی۔ دونوں نے 2022 میں باہمی رضامندی سے علیحدگی اختیار کی۔ ان کے دو بیٹے، نیروان اور یوہان ہیں، جن کی پرورش دونوں مل کر کر رہے ہیں۔