اسلام آباد : وزیراعظم پاکستان محمد شہباز شریف آج کوئٹہ کے ایک روزہ دورے پر پہنچیں گے جہاں وہ امن و امان کی صورتحال پر اجلاس کی صدارت کریں گے۔ اس اجلاس میں جعفر ایکسپریس پر دہشت گردوں کے حملے کے حوالے سے بریفنگ دی جائے گی اور دہشت گردوں سے نمٹنے کے لئے اہم فیصلے کیے جائیں گے۔
وزیراعلیٰ بلوچستان سرفراز بگٹی نے وزیراعظم شہباز شریف سے رابطہ کیا اور انہیں دہشت گرد حملے کی تازہ ترین صورتحال سے آگاہ کیا۔ وزیراعظم نے شہداء کے خاندانوں سے اظہار افسوس کرتے ہوئے کہا کہ پوری قوم اس بزدلانہ حملے اور معصوم جانوں کے ضیاع پر صدمے میں ہے۔
وزیراعظم شہباز شریف نے مزید کہا کہ اس قسم کے بزدلانہ حملے پاکستان کے امن کے عزم کو متزلزل نہیں کر سکتے اور درجنوں دہشت گردوں کو جہنم واصل کر دیا گیا ہے۔ وزیراعظم کا کہنا تھا کہ پاکستان میں امن و استحکام کے قیام کے لئے کوئی بھی کوشش نہیں رک سکتی۔
