امریکی ایوان نمائندگان نے حکومتی اخراجات سے متعلق بل منظور کر لیا، طویل شٹ ڈاؤن کا خاتمہ

واشنگٹن: امریکی ایوان نمائندگان نے حکومتی اخراجات سے متعلق بل منظور کر لیا، جس کے بعد امریکی تاریخ کا طویل ترین شٹ ڈاؤن ختم ہوگیا۔ اس بل کی منظوری کے بعد حکومت کو 30 جنوری تک فنڈز فراہم کیے جائیں گے، جس سے وفاقی حکومت کی مالی سرگرمیاں بغیر کسی رکاوٹ کے جاری رہ سکیں گی۔

امریکی ایوان نمائندگان میں 222 ارکان نے اس بل کی حمایت کی، جن میں 6 ڈیموکریٹس بھی شامل تھے، جبکہ 209 ارکان نے اس بل کے خلاف ووٹ دیا، جن میں 2 ریپبلکن ارکان شامل تھے۔ اب یہ بل دستخط کے لیے امریکی صدر ڈونلڈ ٹرمپ کو بھیج دیا گیا ہے۔

اس سے قبل سینیٹ نے بھی عارضی فنڈنگ بل کی منظوری دی تھی، جس کے بعد یکم اکتوبر سے جاری شٹ ڈاؤن کا اختتام ہوا۔ اس بل کا مقصد غذائی امدادی سکیموں کی بحالی، سرکاری ملازمین کی تنخواہوں کی ادائیگی اور ایئر ٹریفک کنٹرول نظام کو دوبارہ فعال کرنا ہے۔

یہ بل طویل مالی بحران اور وفاقی خدمات میں خلل کے بعد منظور کیا گیا ہے، جس نے ملک بھر میں سرکاری اداروں کی کارکردگی کو متاثر کیا تھا۔ اب اس اقدام سے حکومتی خدمات کی بحالی اور اہم اداروں کی فعالیت دوبارہ بحال ہوگی۔