راولپنڈی اور اسلام آباد میں تعلیمی ادارے 4 دن بعد کھول دیے گئے

راولپنڈی: راولپنڈی اور اسلام آباد میں گزشتہ چند دنوں سے جاری رکاوٹوں کے بعد، آج تعلیمی ادارے دوبارہ کھل گئے ہیں اور شہر کی تمام رابطہ سڑکوں کو ٹریفک کے لیے بحال کر دیا گیا ہے۔ اس کے ساتھ ہی راولپنڈی مری روڈ پر دکانیں اور تجارتی مراکز بھی دوبارہ کھول دیے گئے ہیں۔

 راولپنڈی اور اسلام آباد کے درمیان کی تمام رابطہ سڑکیں کھول دی گئی ہیں، جس سے شہر کے مختلف علاقوں میں نقل و حمل کا سلسلہ دوبارہ شروع ہو گیا ہے۔ تاہم، مری روڈ سے فیض آباد جانے والا راستہ ابھی تک بند ہے، جس کی بحالی کے لئے متعلقہ حکام کام کر رہے ہیں۔

اس کے علاوہ، جڑواں شہروں میں میٹرو بس سروس کو ابھی تک بحال نہیں کیا گیا، جس کی وجہ سے شہریوں کو پبلک ٹرانسپورٹ میں مشکلات کا سامنا ہے۔ دوسری جانب، موبائل فون اور ڈیٹا سروسز کو مکمل طور پر بحال کر دیا گیا ہے، جس سے شہریوں کو بڑی سہولت حاصل ہوئی ہے۔

راولپنڈی میں آئی جی پی روڈ، ڈبل روڈ اور ایکسپریس وے کو ٹریفک کے لئے کھول دیا گیا ہے، جبکہ راولپنڈی سے ڈبل روڈ نائنتھ ایونیو جانے والے راستے کو بھی کھول دیا گیا ہے۔