لاہور اور پنجاب میں فضائی آلودگی خطرناک حد تک پہنچ گئی

لاہور: لاہور سمیت پنجاب کے مختلف شہروں میں فضائی آلودگی کی صورتحال خطرناک حد تک بڑھ گئی ہے۔ شہر کا ایئر کوالٹی انڈیکس (اے کیو آئی) 474 تک پہنچ چکا ہے، جس کے نتیجے میں لاہور آج دوبارہ پاکستان کے آلودہ ترین شہروں میں سرفہرست آ گیا ہے۔

ماحولیاتی ویب سائٹ کے مطابق، لاہور کے مختلف علاقوں میں ایئر کوالٹی انڈیکس انتہائی تشویشناک سطح پر پہنچ چکا ہے۔ سید مراتب علی روڈ کا اے کیو آئی 804، گلبرگ میں 678، ڈی ایچ اے میں 569، پنجاب یونیورسٹی کے اطراف میں 468 اور ماڈل ٹاؤن کے علاقے کا اے کیو آئی 471 ریکارڈ کیا گیا ہے۔

پنجاب کے دیگر بڑے شہر بھی اس آلودگی سے متاثر ہیں، جیسے فیصل آباد کا اے کیو آئی 626 تک پہنچ چکا ہے، جبکہ گوجرانوالہ میں یہ 515 تک پہنچا ہے۔

ماہرین صحت نے شہریوں کو مشورہ دیا ہے کہ وہ ماسک استعمال کریں، غیر ضروری باہر نکلنے سے گریز کریں اور گھروں میں ایئر پیوریفائر کا استعمال بڑھائیں تاکہ صحت کے خطرات سے بچا جا سکے۔

ماحولیاتی ماہرین کا کہنا ہے کہ اس آلودگی کی سب سے بڑی وجوہات میں فصلوں کی باقیات کا جلانا، ٹریفک کا دباؤ اور صنعتی اخراج شامل ہیں، جن کی وجہ سے لاہور اور دیگر شہروں کی فضائی کیفیت بدترین ہو چکی ہے۔ ماہرین کا کہنا ہے کہ اگر اسی رفتار سے آلودگی میں اضافہ ہوتا رہا تو یہ انسانی صحت پر سنگین اثرات ڈال سکتا ہے۔