کراچی: ٹریفک نظام میں بہتری اور حادثات کی روک تھام کے لیے کمشنر کراچی سید حسن نقوی نے شہر کی 11 مرکزی شاہراہوں پر غیر مجاز رکشاؤں کی آمد و رفت پر پابندی عائد کر دی ہے۔
ذرائع کے مطابق پابندی کا اطلاق دفعہ 144 سی آر پی سی کے تحت 15 اپریل سے 14 جون 2025 تک ہوگا۔ یہ فیصلہ کراچی ٹریفک پولیس کی سفارش پر کیا گیا ہے تاکہ خود ساختہ روٹس پر چلنے والے 1+2 اور 1+4 رکشوں کو روکا جا سکے۔
پابندی کی زد میں آنے والی سڑکوں میں شاہراہِ فیصل، آئی آئی چندریگر روڈ، شہید ملت روڈ، مزار عبداللہ شاہ غازی روڈ، اور اسٹیڈیم روڈ سمیت دیگر مرکزی راستے شامل ہیں۔
خلاف ورزی کرنے والوں کے خلاف دفعہ 188 کے تحت قانونی کارروائی کی جائے گی، جبکہ ایس ایچ اوز کو ہدایت دی گئی ہے کہ وہ فوری ایکشن لیں۔ رکشہ ڈرائیورز کو متبادل راستوں پر چلنے کی ہدایت جاری کی گئی ہے۔
