حکومت کا بانی پی ٹی آئی سے رابطے کا کوئی ارادہ نہیں:عرفان صدیقی

اسلام آباد:مسلم لیگ ن کے سینئر رہنما اور سینیٹر عرفان صدیقی نے واضح کیا ہے کہ حکومت کا پاکستان تحریک انصاف (پی ٹی آئی) کے بانی عمران خان سے رابطہ کرنے کا کوئی ارادہ نہیں۔ انہوں نے کہا کہ بانی پی ٹی آئی عدالت کے زیر عمل ہیں اور ان کے خلاف جھوٹے مقدمات نہیں بنائے گئے۔

عرفان صدیقی نے مزید کہا کہ وزیراعظم نے کئی مرتبہ مذاکرات کی پیشکش کی ہے، تاہم پی ٹی آئی صرف سڑکوں پر فساد کے لیے سرگرم ہے۔ انہوں نے پی ٹی آئی کے خیبر پختونخوا میں کیے گئے انفراسٹرکچر کے نقصان کی بھی نشاندہی کی۔

انہوں نے کہا کہ عمران خان کی جیل میں موجودگی سے کوئی سیاسی بحران پیدا نہیں ہوا اور نظام آئینی طور پر چل رہا ہے۔ عرفان صدیقی نے کہا کہ پی ٹی آئی کی تحریک سوا تین سال سے جاری ہے مگر اسے کوئی فائدہ نہیں ہوا۔

عرفان صدیقی نے مطالبہ کیا کہ علی امین گنڈاپور کو فوری طور پر استعفیٰ دے دینا چاہیے اور وقت آنے پر نواز شریف سیاست میں اہم کردار ادا کریں گے۔