غریب ہونا علاج نہ ملنے کا جواز نہیں، کوئٹہ میں 11 منصوبوں کا افتتاح کر دیا، بلاول بھٹو

کوئٹہ: پاکستان پیپلز پارٹی کے چیئرمین بلاول بھٹو زرداری نے کہا ہے کہ غریب ہونے کا یہ مطلب ہرگز نہیں کہ کسی کو علاج کی سہولت نہ ملے۔ کوئٹہ میں ایک اہم تقریب سے خطاب کرتے ہوئے انہوں نے واضح کیا کہ زندگی میں ہر کسی کو علاج کی ضرورت ہوتی ہے اور عام آدمی کو گھر کی دہلیز پر مفت اور معیاری علاج فراہم کرنا ملک کے ہر شہری کا بنیادی حق ہے، ایسا نہیں ہونا چاہئے کہ صرف امیر کا ہی علاج ممکن ہو۔

تقریب کے دوران چیئرمین پیپلز پارٹی نے بلوچستان میں 11 بڑے ترقیاتی منصوبوں کا افتتاح کیا اور اعلان کیا کہ عید کے بعد وہ مزید منصوبوں کے افتتاح اور ترقیاتی کاموں کے دوسرے مرحلے کے لیے جلد دوبارہ کوئٹہ آئیں گے۔ انہوں نے بتایا کہ نیا ٹراما سینٹر بلوچستان کا پہلا پبلک اسپتال بنے گا جس کی سروسز کا مقابلہ پورے پاکستان سے کیا جائے گا۔ انہوں نے یہ بھی یاد دلایا کہ ملک میں پولیو مہم کا آغاز شہید محترمہ بینظیر بھٹو نے اپنے دور میں کیا تھا، جبکہ تھرپارکر میں قحط کی چیلنجنگ صورتحال کا سامنا بھی پیپلز پارٹی نے کامیابی سے کیا۔

بلاول بھٹو زرداری نے عالمی معاشی حالات پر گفتگو کرتے ہوئے انتباہ کیا کہ اس وقت پوری دنیا میں معاشی مشکلات ہیں اور اللہ نہ کرے کہ یہ آگے جا کر بڑے معاشی بحران میں تبدیل ہوں، کیونکہ ایسی صورت میں پسماندہ علاقے اور غریب طبقات سب سے زیادہ متاثر ہوتے ہیں۔ انہوں نے کہا کہ بلوچستان قدرتی وسائل سے مالامال صوبہ ہے اور وزیراعلیٰ بلوچستان نے دو سال میں متعدد منصوبے مکمل کیے ہیں، جس کی بدولت ہماری پرفارمنس باقی صوبوں سے بہتر ہے۔ وہ سندھ کی طرز پر صحت کے بڑے منصوبے بلوچستان میں شروع کر کے متوسط طبقے کی خدمت کے عزم پر قائم ہیں۔