پاکستان سمیت دنیا بھر میں آج جمہوریت کا عالمی دن منایا جا رہا ہے

لاہور : 15 ستمبر کو ہر سال جمہوریت کا عالمی دن منایا جاتا ہے، جس کا مقصد جمہوری نظام کو فروغ دینا اور لوگوں میں جمہوری اداروں کی اہمیت کا شعور بیدار کرنا ہے۔ اس دن کا جشن منانے کا مقصد یہ بھی ہے کہ لوگوں کی زندگیوں کو بہتر بنانے میں جمہوریت کا کردار اجاگر کیا جائے۔

اقوام متحدہ اور مختلف سرکاری و غیر سرکاری ادارے ہر سال اس دن کو مختلف تقریبات، کانفرنسز اور مباحثوں کے ذریعے مناتے ہیں تاکہ جمہوری اقدار کو بڑھاوا دیا جا سکے۔ جمہوریت کا عالمی دن پہلی بار 2008 میں منایا گیا تھا اور تب سے ہر سال اسے جاری رکھا جا رہا ہے۔

جمہوریت کا مطلب ہے کہ عوام اپنے نمائندے خود منتخب کرتے ہیں، اور اس نظام میں انتخابات آزاد، منصفانہ اور برابر ہونے چاہئیں تاکہ ہر فرد کی رائے کو برابر اہمیت دی جا سکے۔ بین پارلیمانی یونین کے مطابق جمہوریت میں لوگوں کو آزادی اظہار اور اپنے حقوق کے تحفظ کی ضمانت دی جاتی ہے۔