یمن کی صورتحال پر امریکا کی نظر، حوثیوں سے رابطے جاری، جے ڈی وینس

کنساس: امریکی نائب صدر جے ڈی وینس نے کہا ہے کہ امریکا یمن اور بحیرہ احمر کے اطراف کی صورتحال پر مسلسل نظر رکھے ہوئے ہے جبکہ حوثیوں سے براہِ راست رابطہ بھی جاری ہے۔

صحافیوں سے گفتگو کرتے ہوئے جے ڈی وینس نے کہا کہ امریکی انتظامیہ یمن کی صورتحال کو ترجیحی بنیادوں پر دیکھ رہی ہے اور خطے کے اہم فریقوں سے مسلسل رابطے میں ہے۔

انہوں نے بتایا کہ امریکا سعودی عرب، متحدہ عرب امارات اور دیگر متاثرہ فریقوں کے ساتھ صورتحال پر تبادلہ خیال کر رہا ہے، جبکہ حوثیوں سے بھی براہِ راست بات چیت کی جا رہی ہے۔

بحیرہ احمر میں واقع بریم جزیرے سے متعلق سوال پر امریکی نائب صدر کا کہنا تھا کہ واشنگٹن صورتحال کی گہری نگرانی کر رہا ہے اور آنے والے دنوں میں بھی حالات پر نظر رکھی جائے گی۔

جے ڈی وینس نے کہا کہ امریکا اس بات کو یقینی بنائے گا کہ خطے میں ہونے والی پیش رفت کے دوران امریکی مفادات کا تحفظ کیا جائے۔