چولستان جیپ ریلی اور ثقافتی سرگرمیوں کے ذریعے پنجاب میں رونقیں بحال ہورہی ہیں، مریم اورنگزیب

بہاولپور: سینئر صوبائی وزیر مریم اورنگزیب نے کہا ہے کہ وزیراعلیٰ مریم نواز کے وژن کے تحت پنجاب میں ثقافتی اور سیاحتی سرگرمیوں کے ذریعے رونقیں دوبارہ بحال ہو رہی ہیں۔ چولستان جیپ ریلی کی تقریب سے خطاب کرتے ہوئے مریم اورنگزیب نے کہا کہ لاہور میں 25 سال بعد بسنت منائی گئی، جس سے عوام میں خوشی کی لہر دوڑ گئی اور مقامی ثقافت کو فروغ ملا۔

انہوں نے اس بات کا بھی ذکر کیا کہ چولستان جیپ ریلی میں دیگر ممالک کے ڈرائیورز کی شرکت نے اس ایونٹ کی بین الاقوامی اہمیت کو واضح کیا۔ ان کا کہنا تھا کہ ایسے مقامی میلوں اور ثقافتی سرگرمیوں سے نہ صرف ثقافت کا تحفظ ہو رہا ہے بلکہ روزگار کے نئے مواقع بھی پیدا ہو رہے ہیں۔

مریم اورنگزیب نے مزید کہا کہ نواز شریف کو چولستان اور اس کے ورثے سے خاص محبت ہے، اور انہوں نے اس خطے کی ترقی کے لیے نمایاں کام کیے ہیں۔ چولستان جیپ ریلی کا انعقاد اس علاقے کی ترقی کے لیے ایک اہم قدم ہے۔

صوبائی وزیر نے بتایا کہ دراوڑ فورٹ کی بحالی کے لیے بہترین کام جاری ہے، اور وزیراعلیٰ مریم نواز کے وژن کے مطابق تمام تاریخی مقامات کو بحال کیا جائے گا۔ انہوں نے کہا کہ پنجاب حکومت نوجوانوں کو اپنی ثقافت سے جوڑنے کی کوشش کر رہی ہے، اور بسنت جیسے ایونٹس اس کا حصہ ہیں۔

انہوں نے اس بات کا بھی اعلان کیا کہ اگلے سال چولستان جیپ ریلی میں وزیراعلیٰ مریم نواز خود شرکت کریں گی، اور اس کے لیے قانون سازی کا عمل شروع کر دیا گیا ہے تاکہ شرکاء کو مکمل تحفظ فراہم کیا جا سکے۔

مریم اورنگزیب نے آخر میں پہلی بار قائم کی گئی ٹورازم اتھارٹی کی بھی تعریف کی، جس کا مقصد سیاحت کے شعبے کو منظم انداز میں فروغ دینا ہے۔