برطانیہ کی خفیہ ایجنسی6 MI کی تاریخ میں پہلی بار ایک خاتون سربراہ مقرر

لندن : برطانیہ کی خفیہ ایجنسی ایم آئی 6 کو 116 سال میں پہلی بار ایک خاتون افسر کی قیادت حاصل ہونے جا رہی ہے۔ بلیز میٹرویلی کو ایجنسی کا نیا چیف مقرر کر دیا گیا ہے، جو ستمبر 2025 میں موجودہ سربراہ سر رچرڈ مور کی جگہ ذمہ داریاں سنبھالیں گی۔

بلیز میٹرویلی 1999 میں ایم آئی 6 کا حصہ بنی تھیں اور اس وقت ایجنسی میں ٹیکنالوجی اور اختراعات کے شعبے کی سربراہ، یعنی ڈائریکٹر جنرل "کیو" (Q) کے طور پر کام کر رہی ہیں۔ وہ مشرق وسطیٰ اور یورپ میں اہم خفیہ مشنز کی قیادت کر چکی ہیں اور برطانوی قومی سلامتی کے ماہر افسران میں شمار ہوتی ہیں۔

وزیراعظم سر کیئر اسٹارمر نے اس تقرری کو تاریخی لمحہ قرار دیا اور کہا کہ بلیز کی قیادت میں ایم آئی 6 موجودہ عالمی خطرات کا مؤثر طور پر مقابلہ کرے گی۔

میٹرویلی نے کیمبرج یونیورسٹی سے اینتھروپولوجی میں تعلیم حاصل کی اور دورانِ تعلیم یونیورسٹی کی روئنگ ٹیم کا بھی حصہ رہیں۔ ان کا ماننا ہے کہ "انسانی رویوں کو سمجھنا ایک کامیاب انٹیلی جنس افسر کے لیے بنیادی صلاحیت ہے۔"

انہوں نے ماضی میں ایم آئی 5 میں بھی اہم ذمہ داریاں نبھائیں، جہاں ریاست مخالف سرگرمیوں کے خلاف آپریشنز کی قیادت کی اور قومی تنصیبات کی سیکیورٹی کی نگرانی کی۔ انہیں 2024 میں برطانوی خارجہ پالیسی میں ان کی خدمات کے اعتراف میں "آرڈر آف سینٹ مائیکل اینڈ سینٹ جارج (CMG)" سے بھی نوازا گیا۔

ایم آئی 6 کے موجودہ سربراہ سر رچرڈ مور نے بلیز کی تقرری پر خوشی کا اظہار کرتے ہوئے کہا کہ وہ ایک ذہین، تجربہ کار اور جدید سوچ رکھنے والی لیڈر ہیں، جو ٹیکنالوجی کے بدلتے رجحانات کو بخوبی سمجھتی ہیں۔

اپنے بیان میں بلیز میٹرویلی نے کہا "یہ میرے لیے اعزاز کی بات ہے کہ مجھے ایم آئی 6 کی سربراہی سونپی گئی ہے۔ میں اپنی دلیر ٹیم اور عالمی شراکت داروں کے ساتھ مل کر برطانیہ کے تحفظ اور مفادات کی حفاظت کے لیے پرعزم ہوں۔"