پاکستان نے بھارت کے لیے فضائی حدود کی بندش میں ایک ماہ کی توسیع کر دی

اسلام آباد: پاکستان نے بھارت کے لیے اپنی فضائی حدود کی بندش میں مزید ایک ماہ کی توسیع کر دی ہے۔ پاکستان ایئرپورٹ اتھارٹی کی جانب سے جاری نوٹم کے مطابق بھارتی رجسٹرڈ طیارے 24 جنوری 2026 تک پاکستان کی فضائی حدود استعمال نہیں کر سکیں گے۔

نوٹم میں واضح کیا گیا ہے کہ اس پابندی کا اطلاق بھارت کے تمام رجسٹرڈ مسافر، ملٹری اور پرائیوٹ جیٹس پر ہوگا۔ یہ نوواں نوٹم ہے اور پاکستان نے 24 اپریل 2025 سے بھارتی طیاروں کے لیے اپنی فضائی حدود بند رکھی ہوئی ہے۔

تجزیہ کاروں کے مطابق اس اقدام کا اثر دونوں ممالک کے فضائی اور تجارتی تعلقات پر پڑ سکتا ہے، اور یہ موجودہ کشیدہ تعلقات کے تناظر میں لیا گیا اہم اقدام سمجھا جا رہا ہے۔