کوشانی: شمالی مقدونیہ کے شہر کوشانی میں واقع ایک نائٹ کلب میں آتشزدگی کے واقعے میں 59 افراد ہلاک اور 150 سے زائد زخمی ہو گئے ہیں۔ یہ افسوسناک واقعہ اس وقت پیش آیا جب نائٹ کلب میں ایک کانسرٹ جاری تھا۔
وزیر داخلہ کے مطابق، یہ آتشزدگی دارالحکومت اسکوپیے سے 100 کلومیٹر دور کوشانی شہر کے نائٹ کلب میں ہوئی۔ وزیر داخلہ نے بتایا کہ 35 افراد کی شناخت ہو چکی ہے اور ہلاک ہونے والوں میں زیادہ تر مقامی علاقے کے لوگ شامل ہیں۔ وزیر داخلہ نے مزید کہا کہ کچھ نوجوانوں نے آتشبازی کی جس کی وجہ سے نائٹ کلب کی چھت کو آگ لگ گئی، جس کے نتیجے میں یہ دلخراش واقعہ پیش آیا۔
پولیس نے اس سلسلے میں مزید تحقیقات کا آغاز کر دیا ہے اور اس حوالے سے 4 افراد کے وارنٹ گرفتاری بھی جاری کیے گئے ہیں۔ شمالی مقدونیہ کے وزیر اعظم ہرسٹیجن میکوسکی نے واقعے پر گہرے دکھ اور افسوس کا اظہار کرتے ہوئے کہا کہ اتنی زیادہ نوجوان زندگیوں کا نقصان ناقابل تلافی ہے۔
