فنی دنیا کا ابدی ستارہ ، شفیع محمد شاہ کی 18ویں برسی آج منائی جا رہی ہے

کراچی: پاکستان کے معروف اداکار شفیع محمد شاہ کی 18ویں برسی آج منائی جارہی ہے۔ رعب دار آواز اور جاذب نظر شخصیت کے مالک شفیع محمد شاہ نے اپنے فن سے نہ صرف ٹیلی ویژن بلکہ پاکستانی سینما پر بھی گہرا اثر چھوڑا۔

شفیع محمد شاہ 1949ء میں سندھ کے شہر کنڈیارو میں پیدا ہوئے اور اپنے فنی سفر کا آغاز حیدرآباد ریڈیو سے کیا۔ اداکاری کے شعبے میں قدم رکھنے کے بعد انہوں نے ڈرامہ سیریل اڑتا آسمان سے اپنے کیریئر کا آغاز کیا، لیکن ان کی شہرت کا دروازہ تیسرا کنارہ کے ذریعے کھلا، جو ان کی زندگی کا ایک سنگ میل ثابت ہوا۔

پاکستانی ڈرامہ انڈسٹری کے ایک عظیم اداکار کے طور پر شفیع محمد شاہ نے چاند گرہن، دائرے، دیواریں، جنگل، بند گلاب، کالی دھوپ، ماروی اور تپش جیسے یادگار ڈراموں میں شاندار کردار ادا کیے۔ ان کی اداکاری میں گہرائی، جذباتی شدت اور حقیقت پسندی کا ایسا امتزاج تھا کہ ہر کردار میں وہ اپنے مداحوں کو محض محظوظ نہیں کرتے تھے بلکہ انہیں زندگی کے مختلف پہلوؤں سے آشنا بھی کرتے تھے۔

فلمی دنیا میں بھی شفیع محمد شاہ نے ایسا بھی ہوتا ہے، تلاش، مسکراہٹ اور دیگر فلموں میں اپنی صلاحیتوں کا لوہا منوایا۔ ان کی اداکاری نے سینما اسکرین پر ایک منفرد چھاپ چھوڑی، جو آج بھی یاد کی جاتی ہے۔

شفیع محمد شاہ کی بے مثال اداکاری اور ان کے فنی سفر کا اعتراف کرتے ہوئے 1991ء میں انہیں صدارتی تمغہ برائے حسن کارکردگی سے نوازا گیا۔ ان کے انتقال کے بعد، 17 نومبر 2007ء کو دو ماہ بعد انہیں ستارہ امتیاز سے بھی نوازا گیا۔

آج شفیع محمد شاہ کی 18ویں برسی پر ان کی یادیں اور ان کی بے مثال کارکردگی پاکستانی فنون لطیفہ میں ہمیشہ زندہ رہیں گی۔ ان کے مداح آج بھی ان کی جادوئی اداکاری اور یادگار کرداروں کو یاد کرتے ہیں۔