پنجاب سمیت ملک کے مغربی اور بالائی علاقوں میں 20 دسمبر سے بارشوں کی پیش گوئی

اسلام آباد : پاکستان کے مغربی اور بالائی علاقوں میں 20 دسمبر سے بارشوں کا سلسلہ شروع ہونے کی پیش گوئی کی گئی ہے۔ پی ڈی ایم اے (پنجاب ڈیزاسٹر مینجمنٹ اتھارٹی) کے ترجمان کے مطابق، پنجاب کے بیشتر اضلاع میں 20 سے 22 دسمبر تک بارش اور برفباری کی توقع ہے۔

پی ڈی ایم اے نے بتایا کہ 20 اور 21 دسمبر کے دوران پنجاب کے پہاڑی علاقوں میں گرج چمک کے ساتھ بارش اور برفباری متوقع ہے، خاص طور پر راولپنڈی، مری، گلیات اور پوٹھوہار ریجن میں یہ موسم بدلنے کی توقع ہے۔

ڈی جی پی ڈی ایم اے، عرفان علی کاٹھیا نے کہا کہ 20 سے 21 دسمبر کے دوران لاہور، شیخوپورہ، سرگودھا، خوشاب، فیصل آباد، حافظ آباد، گوجرانوالہ، منڈی بہاؤالدین، گجرات، سیالکوٹ، جھنگ اور ٹوبہ ٹیک سنگھ میں بھی ہلکی بارش ہو سکتی ہے۔ بارشوں کی وجہ سے دھند اور سموگ کی صورتحال میں کمی متوقع ہے۔

دوسری جانب، مغربی ہواؤں کا سلسلہ 19 دسمبر کو بلوچستان میں داخل ہوگا جس کے بعد بلوچستان، خیبر پختونخوا، گلگت بلتستان اور کشمیر میں بھی بارش اور برفباری کا امکان ہے۔ پہاڑی علاقوں میں لینڈ سلائیڈنگ، سڑکوں کی بندش اور پھسلن کے خطرات بھی لاحق ہیں۔

موسم کے اس تبدیل ہوتے ہوئے حالات میں شہریوں کو احتیاطی تدابیر اختیار کرنے کی ہدایت کی گئی ہے، خاص طور پر پہاڑی علاقوں میں سفر کرتے وقت۔