یکم رمضان کو ملک بھر کے تمام بینک بند رہیں گے، سٹیٹ بینک کا اعلامیہ جاری

کراچی : سٹیٹ بینک آف پاکستان (SBP) نے یکم رمضان المبارک کو ملک بھر کے تمام بینکوں اور مالیاتی اداروں میں "بینک ہالیڈے" کا اعلان کر دیا ہے۔ اس روز عوامی لین دین کے لیے تمام بینک بند رہیں گے، تاہم بینک عملہ معمول کے مطابق دفتر حاضر ہو کر دفتری امور انجام دے گا۔
سٹیٹ بینک کے مطابق، بینکوں کی بندش کا مقصد زکوٰۃ کٹوتی کے عمل کو مکمل کرنا ہے۔ یکم رمضان کو بینکوں میں کوئی عوامی یا مالیاتی لین دین (Public Dealing) نہیں ہوگا اور عملہ صرف کھاتوں سے زکوٰۃ کی منہا کرنے کا کام مکمل کرے گا۔
اعلامیے میں واضح کیا گیا ہے کہ  تمام بینکوں میں موجود 'کرنٹ اکاؤنٹس' سے زکوٰۃ کی کٹوتی نہیں کی جائے گی۔ سیونگ اور دیگر منافع بخش اکاؤنٹس سے حکومت کی جانب سے مقرر کردہ نصاب کے مطابق زکوٰۃ منہا کی جائے گی۔
 وہ کھاتہ دار جنہوں نے قانون کے مطابق زکوٰۃ استثنیٰ کا سرٹیفکیٹ (CZ-50) جمع کروا رکھا ہے، ان کے کھاتوں سے کٹوتی نہیں ہوگی۔ یکم رمضان کے بعد اگلے روز سے تمام بینک اپنے نئے رمضان ٹائمنگز کے مطابق عوامی لین دین کے لیے دوبارہ کھل جائیں گے۔