ڈونیڈن: پاکستان اور نیوزی لینڈ کے درمیان دوسرا ٹی ٹوئنٹی میچ جاری ہے جس میں پاکستان نے نیوزی لینڈ کو 136 رنز کا ہدف دیا ہے۔ بارش کے باعث میچ کا ٹاس تاخیر کا شکار ہوا اور دونوں ٹیموں کے درمیان میچ 15،15 اوورز پر مشتمل ہے۔
نیوزی لینڈ نے ٹاس جیت کر پہلے فیلڈنگ کا فیصلہ کیا۔ پاکستان کا آغاز اچھا نہ رہا اور پہلی وکٹ صرف ایک رن پر گری جب اوپنر حسن نواز صفر پر آؤٹ ہوگئے۔ محمد حارث بھی زیادہ دیر تک کریز پر نہ ٹھہر سکے اور 19 رنز پر 11 رنز بناکر پویلین واپس لوٹ گئے۔ پاکستان کی تیسری وکٹ 50 رنز پر گری جب عرفان خان 11 رنز بناکر آؤٹ ہوئے، جبکہ خوشدل شاہ صرف 2 رنز پر چلتے بنے اور چوتھی وکٹ 52 رنز پر گری۔
پاکستان کی پانچویں وکٹ 76 رنز پر گری، جہاں کپتان سلمان آغا 46 رنز بنا کر آؤٹ ہوگئے۔ اس کے بعد شاداب خان نے 14 گیندوں پر 26 رنز بنائے، لیکن 110 رنز کے مجموعے پر وہ بھی آؤٹ ہوگئے۔ اس کے بعد پاکستان کی وکٹیں تیزی سے گریں، جہانداد خان صفر پر آؤٹ ہوئے، عبدالصمد 11 رنز بنا سکے، اور حارث رؤف ایک رن بنا کر رن آؤٹ ہوگئے۔
پاکستان نے 15 اوورز میں 136 رنز کا ہدف نیوزی لینڈ کو دیا۔ اس میچ کے لیے قومی ٹیم میں ایک تبدیلی کی گئی، اسپنر ابرار احمد کی جگہ حارث رؤف کی ٹیم میں واپسی ہوئی ہے۔ واضح رہے کہ میزبان نیوزی لینڈ کو پاکستان کے خلاف 5 میچز کی سیریز میں 1-0 کی برتری حاصل ہے۔
