سندھ حکومت اور چین کے تعاون سے کراچی میں منی ٹرک کی اسمبلنگ لائن قائم کرنے کا منصوبہ

کراچی: حکومت سندھ اور چین کے درمیان تعاون سے منی ٹرک کی اسمبلنگ لائن جلد ہی کراچی میں قائم کی جائے گی۔ اس حوالے سے سینئر وزیر شرجیل انعام میمن نے کہا کہ چینی سرمایہ کار کراچی میں پلانٹ لگانے پر رضامند ہو گئے ہیں، جس سے مختلف کاروباری گروپس اور افراد کو فائدہ ہوگا۔ انہوں نے یہ بھی اعلان کیا کہ سندھ بھر میں الیکٹرک گاڑیوں کے لیے جلد چارجنگ اسٹیشنز قائم کیے جائیں گے۔

چین میں سپر منی ٹرک کی رونمائی کی تقریب میں سندھ کے سینئر وزیر شرجیل انعام میمن، صوبائی وزیر سید ناصر حسین شاہ اور دیگر حکام نے شرکت کی۔ شرجیل انعام میمن نے کہا کہ سپر منی ٹرک منصوبہ پاک چین صنعتی اشتراک اور تکنیکی تعاون کی شاندار مثال ہے، جو دونوں ممالک کے لیے ترقی اور خوشحالی کے دروازے کھولے گا۔

سپر منی ٹرک ایک انقلابی ایجاد ہے جو شہری اور دیہی علاقوں میں لاجسٹکس کے مسائل کا حل فراہم کرے گی۔ یہ گاڑی پائیدار، سستی اور قابل رسائی ٹرانسپورٹ کا نمونہ پیش کرتی ہے اور پاکستان میں ہلکی کمرشل گاڑیوں کی بڑھتی ہوئی طلب کو پورا کرنے کی صلاحیت رکھتی ہے۔ اس منصوبے سے صنعتی ترقی، مقامی پرزہ سازی، روزگار کے مواقع اور ٹیکنالوجی کی منتقلی کا عمل تیز ہوگا۔

شرجیل انعام میمن نے مزید کہا کہ یہ منصوبہ کراچی کو گاڑی سازی کے میدان میں ایک علاقائی مرکز میں تبدیل کرنے کی جانب پہلا قدم ہے۔ سندھ حکومت اس منصوبے کی ضوابطی معاونت، بنیادی ڈھانچے کی تیاری، اور مقامی افرادی قوت کی تربیت سمیت ہر ممکن تعاون فراہم کرے گی۔

سپر منی ٹرک کی بنیادی خصوصیت یہ ہے کہ اسے آسانی سے ایک سپر منی کار میں تبدیل کیا جا سکتا ہے۔

سینئر وزیر شرجیل انعام میمن نے چیری ہولڈنگ کے چیئرمین ین تونگیو کی ویژنری قیادت کی تعریف کی۔ تقریب میں وزیرِ توانائی سندھ سید ناصر حسین شاہ اور بجٹ پیٹرولیم انویسٹمنٹ ہولڈنگز کمپنی کے گروپ سی ای او زاہد بشیر بھی شریک ہوئے۔